The Definitive Guide to Living in the Capital , Cairo , Egypt

الصورة: ياسر محمود.

الخروج للأماكن التاريخية، خصوصًا اللي فيها آثار إسلامية، له طعم تاني. ومن الشوارع اللي هتحسوا فيها بعظمة القاهرة وتاريخها، وكأنكم رجعتكم للماضي الجميل، هو شارع المعز، اللي بيتميز بوجود أماكن أثرية بطابع إسلامي فريد من نوعه.

وبيتميز شارع المعز لدين الله الفاطمي التاريخي، بوجود العديد من المزارات الأثرية والتاريخية فيه وبهويته المصرية الخالصة، كمان الشارع فرصة رائعة لقضاء وقت ممتع مع عائلتك بأسعار مناسبة، يعني خروجة حلوة بأقل التكاليف.

وبيقع شارع المعز في وسط القاهرة، و تم بناءه في العصر الفاطمي، ومن أهم المباني التاريخية اللي بيتميز بيها الشارع وتقدروا تشوفوها عن قرب: “ضريح سيدي الذوق، باب الفتوح، وكالة قايتباي، مسجد الحاكم بأمر الله، زاوية أبو الخير الكليبات، مسجد وسبيل وكتاب سليمان أغا السلحدار”.

كمان بيتميز الشارع بوجود أماكن رائعة زي: “بيت مصطفى جعفربيت السحيمي، مسجد الأقمر، مسجد حسن كتخدا الشعراوي، سبيل وكتاب عبد الرحمن كتخدا، قصر الأمير بشتاك، حمام السلطان إينال، بيت عثمان كتخدا، مسجد ومدرسة الظاهر برقوق، مجمع قلاوون، سبيل وكتاب خسرو باشا، مسجد ومدرسة الأشرف برسباي، مجموعة الغوري، مسجد الفكهاني، سبيل محمد علي بالعقادين، بيت الشبشيريمسجد المؤيد شيخ، مجمع نفيسة البيضاء وباب زويلة”.

ومن فترة، نفذت وزارة السياحة و الآثار مشروع إضاءة مبهرة للشارع علشان يزيد جماله عن طريق تقنيات جديدة وباستخدام التكنولوجيا الحديثة.

والوصول لشارع المعز سهل جدًا، لو معاكم عربية هتوصلوا لحد حي الحسين، وتركنوا العربية في مكان مناسب هناك، وتتمشوا لحد الشارع، ولو بالمواصلات تنزلوا محطة مترو العتبة ومن هناك هتلاقوا عربيات الحسين اللي هتوصلكم لحد الشارع.