بتبرعاتك.. جمعيات أهلية مصرية بتوصل كرتونة رمضان لمستحقيها
اطعام صائم التبرع في رمضان جمعيات خيرية شنطة رمضان كرتونة رمضان
Mohamed Talaat
المصريين معروفين بكرمهم مهما كانت الظروف، وشهر رمضان المبارك له مكانة كبيرة عند كل المصريين، وبتزيد التبرعات لمساعدة أهلنا من المحتاجين، وعلشان الخير يكون في محله والصدقة تبقى بركة حقيقية للكل بننصحكم لو هتعملوا كراتين رمضان بكميات صغيرة تخلوها للأقربون واللي مقفول عليهم بابهم مش هيقولوا أنهم محتاجين، ولكن لو حابين تتبرعوا لجمعيات أهلية بكميات أو حتى أعداد صغيرة أو أموال فهنقولكم خلال السطور اللي جاية على 3 جمعيات تقدروا تتبرعوا من خلالها لأهل الاستحقاق.
مصر الخير
ملايين الكراتين بتبرعاتكم بتروح لكل محتاج وخاصة في الأماكن البعيدة اللي مبتقدرش ناس كتير توصلها من خلال شبكة متطوعين كبيرة، وبيوفروا كرتونة رمضان بحجمين الأول 6 كيلو وسعرها 225 جنيه والثاني 12 كيلو وسعرها 450 جنيه، وبيضم الأساسيات الغذائية اللي بتحتاجها الأسرة خلال الشهر الكريم، ده غير أن عندهم كرتونة “الستر”، ودي بتكون مليانة مواد غذائية ومعاها لحاف وسعرها 550 جنيه، وكمان عندهم كرتونة “سند العيلة” وزنها 65 كيلو وسعرها 2750 وفيها كل ما تحتاجه الأسرة لمدة شهر كامل، ده غير وجبة “لمة العيلة” لإفطار أسرة كاملة وسعرها 250 جنيه.
تقدروا تعرفوا أكتر عن مصر الخير وطرق التبرع من هنا.
بنك الطعام المصري
بتبدأ كرتونة رمضان في بنك الطعام المصري بـ8 كيلو منتجات غذائية وسعرها 275 جنيه، و13 كيلو بسعر 450 جنيه، ده غير وجبات إفطار الصائم اللي تبدأ من 65 جنيه، وبيعملوا مائدة إفطار في كل محافظات مصر تقدروا تتبرعوا لها بأي مبلغ كان غير الأسهم اللي عندهم وبتبدأ من 1000 جنيه.
تقدروا تعرفوا أكتر عن بنك الطعام المصري وطرق التبرع من هنا.
مرسال
مؤسسة مرسال عندها شعار حلو جدًا، أن احتياجات الناس مختلفة وكل أسرة لها متطلباتها وعلشان كده عاملين كارت السند وده بيستخدم في شراء منتجات الخير خلال شهر رمضان وقيمة الكارت الواحد 500 جنيه تقدر الأسرة تشتري متطلباتها بدون أي شعور بالخجل وكمان هيجيبوا كل اللي نفسهم فيه.
تقدروا تعرفوا أكتر عن بنك الطعام المصري وطرق التبرع من هنا.
