The Definitive Guide to Living in the Capital , Cairo , Egypt

أكشاك، بياعين، وقمامة.. وحاجات أكتر على أرصفة القاهرة خلتنا مش عارفين نمشي على الرصيف، وبقينا نمشي في المقابل في الشارع، وده ممكن يعرضنا لحوادث كتير.. لكن فيه مبادرة جديدة بدأتها محافظة القاهرة مؤخرًا وهدفها تحرير الأرصفة من الإشغالات دي.

المبادرة اللي بنتكلم عليها هي “الرصيف من حق المشاة” اللي هدفها رفع الإشغالات عن الأرصفة واستعادة حق المواطن فيها، وعلشان المبادرة دي تنجح محافظة القاهرة بتقوم حاليًا بتنفيذ حملات كتير في جميع الأحياء لرفع الإشغالات الموجودة على أرصفة شوارع العاصمة، ومنع رجوعها تاني.

محافظة القاهرة بتقول إن المبادرة معمولة علشان حق المشاة فى السير على رصيف آمن وعدم اضطرارهم للنزول للشارع، وده أمر بيؤدي لعرقلة المرور وكثير من الحوادث.

المبادرة هتضمن كمان عدم السماح بخروج المطاعم والقهاوي عن المساحات المرخصة لهم وإزالة الأكشاك المخالفة، كمان هتشمل ترميم الأرصفة وإعادة دهانها علشان يبقى شكلها أجمل.

وبدأت حاليًا بعض أحياء القاهرة في تنفيذ المبادرة ومنها حى السلام، وحى شبرا.

كمان بدأ حى مصر الجديدة فى تركيب لوحات إرشادية لتعريف المواطنين بأهمية ودور مبادرة الرصيف من حق المشاة، والبداية على رصيف حديقة الميرلاند المواجهة لشارع محمد نافع، وده بعد تطويره ودهانه.

نتمنى المبادرة دي تنجح.. ويرجع الرصيف فعلًا بجد حق للمشاة!