The Definitive Guide to Living in the Capital , Cairo , Egypt

الحكومة المصرية نفذت أول مشروع لشارع 306 المتخصص في خدمات المطاعم والكافيهات، في منطقة الدقي، وده ضمن سياستها في تشغيل الشباب وتوفير فرص عمل لهم، وكان الاختيار من خلال معايير خاصة اهتمت بالجودة والتجديد، وعلشان أهمية الشارع ده اللي موجود في شارع المتحف الزراعي، زورناه علشان نقولكم كل التفاصيل عنه، وأكيد لما تروحوا هتنبسطوا بالمشروعات اللي هناك والشباب اللي بيبدعوا في الأكل.

الشارع هو عبارة عن استغلال للحديقة الوسطى للمنطقة، ومعمول فيه مشروعات أكل وشرب وخدمات موبايلات، ومفيش رسم دخول، وهتلاقى عندهم أماكن جلوس في النص علشان لو حبيت تقعد هناك شوية، وكل الخدمات هناك متوفرة دليفري عن طريق أبليكيشن أطلب، وكل الخدمات هناك بتقدمها  كرفانات معمولة مخصوص بشكل مميز حسب كل نشاط.

لما رحنا زورنا المكان لقينا مطاعم كتير زي كوستا اللي متخصص في الكريب بكل أنواعه، وأسعاره بتبدأ من 22 جنيه وأعلى سعر 45 جنيه، وكمان فيه Juice Location وبيقدم العصائر الفرش والكوكتيلات وغيرها بأسعار تبدأ من 22 جنيه للجوافة والبرتقال وغيرهم، وبتوصل لبعض الأنواع زي ميكس كاب لـ45 جنيه.

أما أكلة هنية فبيقدم سندوتشات سريعة بشكل وأحجام مختلفة بأسعار تبدأ من 31 جنيه، وبتوصل لـ167 جنيه للوجبة الهنية، ووجبة الأطفال سعرها 35 جنيه، ده غير مطعم Rizey’s Fish & ships، وده بيقدم سندوتشات ووجبات سمك بتبدأ أسعارها من 25 جنيه وبتوصل لـ80 جنيه.

ولمحبين الوفل هتلاقوا What the waffle، وهو بيقدم أنواف وفل مختلفة من 25 جنيه وأقصى سعر 45 جنيه، ده غير مطعم في رغيف اللي عنده كل حاجة في رغيف، واللي هتلاقوا عنده ديك رومي وحمام في رغيف، وأسعاره بتبدأ من 12 جنيه لرغيف الأومليت وبتوصل لـ60 جنيه لرغيف حمامة ونص مشفية، وده غير وجبات الأطفال اللي سعرها يبدأ من 22 جنيه ومعاها لعبة هدية.

فيه كمان حواوشينا اللي بيقدم الحواوشي بكل الأنواع ووجبات وسندوتشات وأطباق، والأسعار بتبدأ من 8 جنيه وبتوصل لحد 55 جنيه، وماتنسوش تزوروا مرزوق، والمنيو بتاعه أصغر من كف الإيد، وبيقدم 9 أصناف بالطريقة السوفلاكي، وهي طريقة أكل يونانية، والسعر بيبدأ من 15 جنيه وأعلى سعر 35 جنيه.

ولو أنتم بتحبوا الأكل الشعبي الحرش، هتلاقوا عربية العو اللي بتقدم كبدة وسجق وغيرهم من سندوتشات الشارع وأسعاره من 7 لغاية 12 جنيه، ولمحبي البرجر لهم مكان هناك في شارع 306، مع مطعم Rock Burger اللي أسعاره بتبدأ من 35 جنيه، وبتوصل لـ70 جنيه.

ولو عاوزين تاكلوا شاورما أو فلافل سوري، فعليكم وعلى مطعم سيخ اللي بيقدم أكل  كله على السيخ، سندوتشات ووجبات وفتة،  والأسعار بتبدأ من 9 جنيه لسندوتش فلافل و13 جنيه لسندوتش شاورما فراخ وبتوصل لـ200 جنيه لكيلو الشاورما لحمة، ولو عاوزين فراخ ففيه هناك مطعم MR.Chicks، اللي عندهم سندوتشات ووجبات وباستا ومكسات وريزو بأسعار بتبدأ من 10 جنيه وبتوصل لـ75 جنيه للفردي و230 جنيه للوجيات العائلية، ووجبات الأطفال بـ32 جنيه.

ولو بتحبوا الباستا فهناك فيه مطعم Large pasta، وبيقدم كل أنواع المكرونات بأسعار تبدأ من 30 جنيه وأعلى سعر 90 جنيه، غير بقى مطعم تشيكن داي، اللي بيقدم سندوتشات ووجبات فراخ مشوي ومقلي بسعر بيبدأ من 30 جنيه لحد 75 جنيه، ووجبات الأطفال بأسعار 25 و28 جنيه.

أما لو محتاجين تشربوا حاجة على السريع وتقعدوا وقت لطيف من غير أكل تقدروا تطلبوا مشروبات من Challenge اللي أسعاره بتبدأ من 8 جنيه للشاي، وبتوصل لـ37 جنيه لمشروب تشالينج المخصوص، ولو حابين تلفوا العالم ممكن تاكلوا من مطعم The fastes of the world، اللي بيقدم سندوتشات من أوروبا وآسيا وأمريكا، وعندهم العيش ألوان “أخضر – أحمر – بني”، بأسعار تتراوح ما بين 55 لغاية 65 جنيه.

وكمان فيه مطعم Burger hand made، وبيقدم 3 وجبات فقط مكس جريل بـ95 جنيه، وجريل تشكن بـ95 جنيه، وستيك بـ115 جنيه، غير المقبلات، واللي نفسهم في الفول والطعمية والكشري والمكرونة بتاعة المطاعم الشعبية هتلاقوها في مطعم Orienta، بأسعار تبدأ من 3.5 جنيه وبتوصل لـ23 جنيه.

ومتنسوش مطعم كودو نودلز لو كنتم بتحبوا النودلز بنكهات مختلفة وبيبدأ سعر الطبق من 10 جنيه وبيوصل حتى 40 جنيه، وعندهم شوربة عدس سعرها 15 جنيه، وكمان مطعم Cheese اللي بيقدم كاساديا وطاسات بأسعار تبدأ من 25 جنيه وتوصل لـ75 جنيه، ومطعم Pasta Shopa، اللي بيقدم مكرونات أسعارها من 25 حتى 90 جنيه.

ولو بتحبوا الحلو فمطعم يا زلابيا بيقدم بطاطا وبلح الشام وسندوتشات خفيفة وسعرهم ما بين 10 جنيه حتى 30 جنيه، وعلشان الخروجة تبقى عائلية فيه منطقة لعب أطفال الساعة فيها بـ20 جنيه، وهتلاقوا هناك أكتر من لعبة متقفلة ومتأمنة كويس وفيه مشرفة كمان علشان الأطفال ميخرجوش لوحدهم.

الحساب والطلب في شارع 306 مختلف عن الأماكن العادية، وده بأنكم بتفتحوا حساب ويكون لكم رقم سري، في كشك الشحن وتشحنوا رصيدكم، وبعد كده  تروحوا المطعم أو الكافيتريا وتختاروا االلي محتاجينه، وتشوفوا المبلغ كام وتضربوا الرقم السري على السيستم الخاص بالمكان، وتستلموا الطلب بتاعكم عادي، ولو ليكم فلوس باقية بتروحوا للكاشير اللي شحنتوا منه وتاخدوها منه أو ممكن تحتفظوا بيها للمرة الجاية.

وإحنا في كايرو 306 بنشجعكم تروحوا تدعموا الشباب هناك وتجربوا أكلهم والمشروبات، وماتنسوش كمان أن كلهم بيبدأوا من الصفر وانصحوهم باللي أنتم شايفين انه هيطور منهم ويخليهم يتقدموا، وماتنسوش أن شارع 306 موجود في الحديقة الوسطى لشارع المتحف الزراعي، وقريب من وزارة الزراعة وشارع البطل أحمد عبد العزيز في الدقي.