The Definitive Guide to Living in the Capital , Cairo , Egypt

اتخيل معانا كده وإنت ماشي على الدائري وسط زحمة العربيات، بدل ما تشوف بس عمارات وكباري وأسمنت، تلاقي أشجار خضرا حوالين الطريق! ده اللي بيحصل حاليًا ضمن مبادرة “100 مليون شجرة”، اللي بدأت محافظة القاهرة تنفيذها لتشجير الطريق الدائري، تحديدًا من المقطم باتجاه الجيزة. الفكرة مش بس عن تحسين الشكل العام، دي كمان خطوة مهمة لتحسين جودة الهواء وتخفيف الحرارة في شوارع القاهرة المزدحمة.

البداية من المقطم 

محافظ القاهرة، الدكتور إبراهيم صابر، أكد إن الهيئة العامة لنظافة وتجميل وإنارة القاهرة بدأت المرحلة الأولى للمشروع، واللي بيشمل اختيار مواقع رئيسية على الدائري تصلح للتشجير. والأشجار اللي هيتم زراعتها مش أي نوع، لكن اختاروا أشجار وارفة الخضرة ومتطلباتها قليلة من الميه، عشان تتماشى مع الطبيعة المناخية والتحديات البيئية اللي بنواجهها.

استدامة وجمال 

المبادرة دي مش مجرد زراعة وخلاص، لكنها معمولة بطريقة تضمن استدامة الحفاظ على الأشجار، وتقليل استهلاك ميه الري، وفي نفس الوقت مراعاة الشكل الجمالي للأماكن اللي هيتم تشجيرها. كل ده بالتنسيق مع وزارات البيئة، والإسكان، والزراعة، عشان يطلع الطريق بشكل منظم وجذاب يعكس المظهر الحضاري للقاهرة.

حلم قريب 

لو المبادرة دي كملت بالشكل المطلوب، الطريق الدائري مش هيبقى مجرد طريق للمواصلات بيربط أطراف القاهرة، لكن هيبقى مساحة خضرا تدي إحساس بالحياة والهدوء وسط صخب المدينة. مشروع زراعة الأشجار ده خطوة أكيدة نحو مستقبل أفضل وأخضر للقاهرة!