The Definitive Guide to Living in the Capital , Cairo , Egypt

عمر مراد

مصدر الصور

كلنا بنحب نروح أماكن جديدة، علشان نخوض تجربة مختلفة، والحديقة اليابانية بحلوان تجربة مميزة، وأقرب لرحلة سفر. تعالوا نعرف تفاصيل أكتر عن المكان المميز ده.

بدأ المهندس المعماري ذو الفقار باشا في عام 1919 يحلم ويفكر في بناء مكان يعبر عن حضارات الشرق وخاصة الحضارة اليابانية، وفي الوقت ده كانت كوريا أعلنت انفصالها عن اليابان، حلم الحديقة اتنفذ فعلًا على أرض الواقع في عام 1922 على مساحة حوالي 10 أفدنة، الحديقة كان اسمها في البداية “كشك الحياة الأسيوي”، وبعد كده اتغير اسمها وأصبح الحديقة اليابانية. بمرور الزمن مرت الحديقة بفترة أهمال، لحد ما قررت الحكومة المصررية تلمع الدهب تاني في عام 2006 وترجع الحديقة أحسن من الأول.

طب إيه المميز في الحديقة اليابانية؟.. الحديقة تصميمها على الطريقة الآسيوية. أول ما هتدخل من الباب هتحس إنك نزلت من الطيارة علشان تأخد جولة في آسيا، هتقابلك شلالات مياه صغيرة والمياه المتحركة في الحضارة الآسيوية بتعبر عن الحياة في العالم الآخر، هتشوف كمان صخور كتير واللي بتعبر هي كمان عن القوة والصلابة، مع الحياة والقوة والصلابة بتحتاج لشوية مشاعر مبهجة وسعادة وده اللي بتعبر عنه النباتات والأشجار الجميلة في الحديقة.

هتقابل هناك تماثيل كتير ومختلفة أولهم تمثال “زهرة اللوتس” واللي شايل رأس المهندس “ذو الفقار” مصمم الحديقة وحواليه تماثيل أفيال وهم حراس الحديقة، ولأن الحضارة الآسيوية بتمتاز بالحكمة فكان لكل تمثال غرض معين، يعني هتلاقي تمثال لست مغمضة عينها والكسوف والخجل على وشها مصحوب بابتسامة خفيفة واللي بيتسمى كمان “وجه الحياة” ودا بيرمز لقوة الست الشرقية، وكمان هتلاقي 3 تماثيل لقردة الأول سادد أذنه والتاني مغمض عنيه والتالت إيده على فمه وهنا التمثال بيعبر عن إنك تخليك في حالك ومتتدخلش في حاجة ماتخصكش، وهتلاقي في وسط الحديقة 48 تمثال ودول بيعبروا عن المعلم شيبه وهو بيعلم تلاميذه الديانة البوذية والزوار بيسموه “علي بابا والحرامية”، وكمان في ركن الملك فاروق هتلاقي تمثال لبوذا.

أنت كدا شوفت جزء كبير بيحكي كتير من الحضارة الآسيوية، تقدر تتمشى وسط الأشجار واللي كلها أصلها آسيوي زي شجر التين البنغالي، والسدر الأروكايا والمشطورة وغيرها، ولأن كل حاجة حواليك بتحسسك إنك في قارة تاني تقدر تزور كشك الموسيقى في الحديقة هتلاقي موسيقى آسيوية تعجبك.

خلصت الزيارة؟ أنت كدا سافرت آسيا وأنت في حلوان!