The Definitive Guide to Living in the Capital , Cairo , Egypt

تم تنفيذ 94% من إجمالي أعمال المتحف المصري الكبير، وباقي بس شوية رتوش أخيرة من بعدها يتم اعلان جاهزيته لاستقبال كل محبي الآثار الفرعونية حول العالم.

الدكتور عيسى زيدان، مدير عام الشؤون التنفيذية للترميم ونقل الآثار بالمتحف المصري الكبير، أكد ان المتحف هيستوعب 5 مليون زائر كل سنة، وأنه تم الانتهاء من الإنشاءات والتشطيبات، وفاضل شوية حاجات بسيطة قبل افتتاحه رسميًا في حفل عالمي مع نهاية الربع الأخير من العام اللي جاي 2020.

تصميم المتحف المصري الكبير اتعمل علشان يتناسب مع الحضارة المصرية العريقة وعلشان ينافس المتاحف العالمية، خاصة انه هيضم أكثر من 100 ألف قطعة أثرية من العصور الفرعونية واليونانية والرومانية، ومعاهم ميدان المسلة المعلقة في الداخل، وهي أكبر مسلة معلقة على مستوى العالم، والبهو العظيم اللي هيكون في مقدمته تمثال الملك رمسيس الثاني ومن بعده الدرج العظيم اللي هيتزين بـ87 قطعة أثرية ضخمة من أفضل القطع الأثرية الموجودة في مصر، ومن خلال الخلفية الزجاج هتشوفوا الأهرامات الثلاثة.

وهيضم المتحف قاعة الملك توت عنخ آمون بمساحة 7521 متر، وهيتعرض فيها كل مقتنيات الملك كاملة، بخلاف 4 قاعات هتعرض العصور المصرية بداية من عصر الدولة القديمة، مرورا بعصر الدولة الوسطى والدولة الحديثة حتى عصر الدولة اليونانية والرومانية.