The Definitive Guide to Living in the Capital , Cairo , Egypt

الصورة من صفحة أمريكانا على الفيسبوك

شركة أمريكانا مصر ووزارة التضامن الاجتماعي، افتتحوا فرع جديد لـ مطعم “هارديز”، كل اللي موجودين فيه وبيشغلوه من أصحاب الهمم، من الصم والبكم، وذوي القدرات الخاصة، والمطعم ده ضمن مبادرة “حياة جديدة”، اللي وقعتها الوزارة لتطوير الخدمات والفرص الوظيفية لذوي الهمم، وفي السطور اللي جاية هنقولكم على تفاصيل المطعم.

في البداية حابين نعرفكم إن المطعم مش هو الأول من نوعه في مصر اللي بيديره ذوي الهمم، لأن سلسلة كنتاكي بدأت الفكرة من فترة كبيرة وعندها 4 فروع بيداروا عن طريق ذوي الهمم بنسبة 90%، وكمان فيه مطعم كاندي كراش، اللي بيدار بالكامل عن طريق الصم والبكم.

أما مطعم “هارديز” الجديد فهو الفرع الأول لهم اللي بيدار عن طريق ذوي الهمم وموجود في مدينة نصر.

مي قناوي، رئيسة الاتصال المؤسسي لمجموعة أمريكانا قالت إن ده أول مطعم لـ “هارديز” على مستوى العالم يدار بمجموعة من الشباب أصحاب الهمم، وبررت اختيار مدينة نصر للمطعم بأنها المنطقة الأكثر زحمة في القاهرة، وده دليل على مدى قدرة الشباب دول على العمل حتى تحت ضغط.

العاملين في مطعم ذوي الهمم 15 فرد، كلهم من شباب الصم والبكم، “المطبخ – الشيفات – مقدمي الخدمات – الكاشير” وغيرهم من العاملين والإداريين، واتدربوا على كيفية التعامل واستقبال الزبائن، وبيتم طلب الطعام من خلال المنيو المطبوع بصورة واضحة، ومش هيحتاجوا أي وسيلة مساعدة للتواصل مع بعض، وتوصيل المعلومة، لأن كل حاجة مكتوبة وواضحة جدًا.

عنوان الفرع: داخل جنينة مول، مدينة نصر.

الخط الساخن: 19066