The Definitive Guide to Living in the Capital , Cairo , Egypt

الحرف اليدوية في مصر كتير وفيها مبدعين، سواء كان ده شغلهم بشكل كامل أو واخدين الموضوع هواية، وكل حد فيهم بيتميز بحاجة مختلفة ومميزة عن التاني، وإحنا كمصريين بنعشق كل ما هو هاند ميد وبندور على  مختلف منتجات الحرف اليدوية علشان نشتريها أو نهاديها، وهنا ظهرت مبادرة “اطلع للنور” اللي جمعت كل العاملين والمحبين للحرف اليدوية في مكان واحد وهنقول لكم على كل اللي محتاجين تعرفوه عنها.

 

مبادرة “اطلع للنور” اتأسست في فترة جائحة كورونا، بعد ما الفكرة جت للدكتورة ماريان كريم، وكانت دايمًا بتنادي بأن الناس وقت الجائحة وبسبب عدم النزول للشارع تتعلم أي حاجة تشغل بيها نفسها وتطور مهاراتها من خلال الإنترنت، وهي بنفسها كانت محتاجة تتعلم برمجة وغيرها ومش عارفة تبدأ منين ولا إزاي، وهنا جت فكرة المبادرة تحت شعار “how to start”، وفيها الناس بتتكلم عن قصص نجاحهم ويشاركوا إزاي بدأوا في مجالهم والعقبات اللي واجهتهم علشان غيرهم يتفادوها.

والمبادرة كانت في البداية للسيدات فقط، وعجبت ناس كتير وبدأت المشاركات تزيد والناس بتدعم وتشجع بعض ورغم ظروف كورونا إلا أن القصص والحكايات بتاعة المشاركين في المبادرة “اطلع للنور” كانت ملهمة للجميع وفيه اللي كان ناجح بالفعل وفيه اللي نجح بتشجيع الناس ودعمهم، وكبرت المبادرة وبقت القصص من كل مصر، وكمان من الوطن العربي، وبدأت الناس والميديا تتكلم عن المبادرة.

ومع كبر المبادرة وانتشارها ووصولها لمليون متابع بدأ الرجال يبدوا رغبتهم للمشاركة وتم فتح المبادرة للرجال والسيدات، وكتير استفادوا من فتح المبادرة للجنسين، ونجحت المبادرة في إنها تكون باب رزق لناس كتير لأنها أصبحت منتشرة أكثر وكل حد بينشر تجربته في المبادرة بييجي لهم عملاء من كل مكان يطلبوا منتجاتهم، وحاليًا المبادرة مفتوحة للمشاركة لكل الناس بدون أي قيود.

مبادرة أطلع للنور حصلت على لقب أقوى مبادرة عربية في الوطن العربي عام 2022، وحاليًا فيه مليون حرفي في مختلف المجالات المختلفة منضمين للمبادرة، وأصبحوا أكثر قوة في مجالاتهم، بتقول الدكتورة ماريان كريم “بنسعى لتقديم المزيد لهم، ومساعدتهم في ترويج أعمالهم وقصص نجاحهم عبر منصات التواصل الاجتماعي المختلفة، وتقديم الدعم المادي والمعنوي لهم لرفع معنوياتهم وزياده انتاجهم”.

وبتكمل: “اطلع للنور أخدت على عاتقها هدف الحفاظ على التواصل البشري في قلب التجارة، ومساعدة مجتمع الحرفيين لتحويل أفكارهم لأعمال تجارية ناجحة من خلال المنصة اللي بتربطهم بآلاف المشترين اللي بيحبوا اللمسات الإنسانية الفريدة في الهاند ميد، وده من خلال رؤية لرسم طريق سهل لكل الحرفين وأصحاب المشاريع الناشئة وتسويق منتجاتهم بشكل متميز عبر الويب سايت والسوشيال ميديا لزيادة رباحهم”.

تقدروا تعرفوا أكتر عن المبادرة من خلال زيارة موقع اطلع للنور.

أو من خلال صفحة الفيسبوك من هنا.