The Definitive Guide to Living in the Capital , Cairo , Egypt

بقلم: رنا شرف

الصورة الرئيسية لقصر المنسترلي تصوير: مناديلي

القاعدة بتقول إنه بعد نص الشهر الميزانية بتبقى مش ولا بد! ولو كنت من عشاق الخروجات فأكيد بيكون نفسك تخرج وتنبسط بس من غير ما تدفع فلوس كتير، وبما إن الويك إند قرب، والمرتب بيخلص، قررنا نقترح عليك 3 خروجات جميلة وفي نفس الوقت مش مكلفة.

سينما جراند نايل تاور

خروجة السينما دائمًا لها مكانة خاصة عند عشاق الخروجات في القاهرة، وإحنا هنا بنرشح لك تغير جو وتتفرج على فيلم حلو في نفس الوقت، وده اللي هتلاقيه في سينما جراند نايل تاور، بجاردن سيتي، واللي موجودة على كورنيش النيل بداخل فندق جراند نايل تاور، واللي بتتميز بمستواها الجميل وفي نفس الوقت سعرها المعقول، سعر تذكرة السينما هناك 50 جنيه بس!

السينما بتعرض حاليًا مجموعة أفلام مميزة، زي: ماكو وNo Time to Die، وفرق خبرة، وThe Accursed.

تمشية في وسط البلد

تاني أجمد خروجة مناسبة للويك إند لو ميزانيتك قليلة، هي وسط البلد، ودي بقى نقدر نقول عليها الخروجة المنقذة لكل أصحاب الميزانية القليلة، لإن مجرد التمشية في وسط البلد متعة كبيرة، ويا سلام لو حبيت تاكل آيس كريم مع التمشية، في الحالة دي عندك محلات كتير، بس أشهرهم العبد، اللي تقدر تشتري منه آيس كريم سعر البولة 12 جنيه، أما لو حابب تاكل أكلة شعبية، فلازم تجرب طبق من عند كشري التحرير، وهناك الأسعار بتبدأ من 14 جنيه.

كمان مطعم القزاز في وسط  البلد، شارع صبري أبو علم، طلعت حرب، بيقدم أكل مميز بسعر معقول، هناك ممكن تطلب ساندوتش شاورما عظيم بسعر بيبتدي من 14 جنيه، ولو حابب أكل بيتي فهتلاقي طواجن جميلة، وننصحك تجرب طاجن الخضار باللحمة المفرومة وسعره 47 جنية.

ولو حابب بقى أكل شعبي فتقدر تاكل فول وفلافل من مطعم فلفلة، واللي بيقدم ساندوتشات فول وطعمية جامدة، وبعدها تعدي على محل عصير فواكه سليمان باشا في 30 شارع طلعت حرب، اللي بيقدم أجمد عصائر هتجربها وبأسعار مناسبة.

قصور تاريخية

أما لو بتحب الأماكن التاريخية، فإحنا بنرشح لك قصر البارون في مصر الجديدة، سعر تذكرة الدخول 30 جنيه، وهناك هتستمتع بالمكان لأنه عظيم فعلًا، القصر كبير جدًا وفيه حديقة جميلة وكافتريا تقدر تطلب منها شاي وقهوة، وماتنساش تتصور بتليفونك أجمل صور تذكارية، ولو معاك كاميرا محترفة هتدفع لها رسوم 50 جنيه، وهتبقى استمتعت بمكان تاريخي واتفسحت برضه.

كمان فيه مكان حلو جدًا لو حابب جو القصور التاريخية، وهو قصر المنسترلي في منطقة المنيل، وده مكان جميل والوصول له سهل جدًا، ممكن تركب المترو وتنزل محطة الملك الصالح وتتمشى شوية، أو تروح بأتوبيس نقل عام، والمكان يستحق الزيارة، ومناسب كل عشاق التصوير والطبيعة، وكمان هتستمتع بمنظر النيل والخضرة ومقياس النيل التاريخي، وسعر التذكرة 20 جنيه بس.

قررت تزور إيه من الأماكن اللي قولنا لك عليها؟