The Definitive Guide to Living in the Capital , Cairo , Egypt

قبل ما ندخل في الموضوع، ماننساش إن معظمنا في وقت من الأوقات كانت أحلام طفولته عربية خارقة بتمشي بسرعات خيالية، ويمكن لحد دلوقتي بنحلم بده، يمكن مع اختلاف بسيط شوية، زي مثلًا إن العربية تبقى 4×4 أو فيها كماليات ورفاهية مختلفة.

ده بالضبط اللي عمله النجم المصري العالمي “محمد صلاح” بعد ما وصل لحلمه اللي ملايين من الشباب المصري نفسهم يوصلوله أو بيشوفوه قدوة ليهم في النقطة دي تحديدًا، فبعد ما وصل “صلاح” لحلمه، بدأ يحقق أحلام الطفولة ويشتري مجموعة من العربيات اللي أي شاب في العالم بيحلم بواحدة على الأقل منها.

صحيفة “صن” البريطانية، قالت في تقرير حديث ليها إن “صلاح” ضم مؤخرًا عربية جديدة لأسطول عربياته الحالي واللي بيضم 6 عربيات، وطبعًا ده كان خبر صادم لبعض الناس، لإن المعروف عن طبيعة صلاح إنه شخص هادئ جدًا، فليه هيحتاج لعربيات سوبر رياضية من النوع ده؟

اللي فتح الكلام عن أسطول عربيات محمد صلاح أصلًا خلال الأيام اللي فاتت، هي عربيته الجديدة والمفضلة بالنسباله “بنتلي كونتينتال gt” واللي تمنها حوالي 160 ألف جنيه إسترليني، والموديل ده تحديدًا من “بنتلي” يعتبر ثاني أكثر موديل عربيات بيمتلكه نجوم الدوري الإنجليزي في 2019، بعد الوحش الإنجليزي “رينج روفر”  svr الرياضية.

من العربيات اللي عرفنا إنها موجودة في أسطول “صلاح” هي الـ “تويوتا كاميري” واللي عايش في الخليج أو سافر للخليج في وقت من الأوقات أكيد هيبقى عارف يعني إيه “تويوتا كاميري”.

 العربية دي قيمتها في إنجلترا حوالي 29 ألف إسترليني، وهي بتعتبر من فئة العربيات العائلية متوسطة السعر، ده غير إنها عربية عملية جدًا، وموفرة في البنزين إلى أقصى درجة.

العربية اللي بعد كده هي العربية اللي نقدر نقول عليها “العِشرة” وهي AUDI Q7 لإن دي العربية اللي اشتراها “صلاح” أول ما ساب “روما” وراح يلعب في “ليفربول” وهي فعلًا العربية المفضلة عند كتير من لعيبة الكورة والرياضيين، وتعتبر العربية الرسمية للاعبي برشلونة حتى بعد نهاية عقد الرعاية بين أودي وبرشلونة. 

وطبعًا ما ينفعش لاعب كورة عالمي بمستوى صلاح مايركبش “لامبورجيني“، وفي الحقيقة هي فعلًا واحدة من أسطول عربيات “أبو مكة” وتحديدًا موديل “أفنتادور” وسعرها حوالي 271 ألف إسترليني.

أما عربية صلاح اليومية، واللي بيركبها وهو رايح التمرين، وبنشوفه بيها كتير، هي مرسيدس AMG GLE دفع رباعي، وتمنها 65 ألف إسترليني، وابقوا احسبوها أنتم بالمصري، وشوفوا هتطلع كام؟

واضح إن صلاح بيحب المرسيدس، لإن عنده في أسطول عربياته مرسيدس تانية، بس المرة دي واحدة من أغلى العربيات اللي بتتنتجها شركة مرسيدس، وهي الأسطورة SLS AMG ROADSTER، وبيبدأ سعرها من 176 ألف إسترليني وانت طالع، حسب الكماليات والإضافات اللي حابين تضيفوها في العربية، وده لإنها بتتصنع بطلب خاص، يعني مش هتلاقوها في معارض العربيات عادي.