The Definitive Guide to Living in the Capital , Cairo , Egypt

القاهرة مدينة حية، متحركة، كل يوم فيها جديد، أهلها بيحبوا السهر، وشوارعها بترحب دائمًا بعشاق الخروج والانبساط.. في الموضوع ده هنعرفكم على أفضل وأرخص الأماكن المفتوحة في القاهرة اللي هتحسوا فيها بروح رأس السنة.. جاهزين؟

كورنيش النيل

كورنيش نيل القاهرة واحد من أشهر الأماكن في العاصمة المصرية اللي بيتوجه لها أغلب المصريين للخروج والاحتفال وركوب المراكب النيلية، وفي ليلة رأس السنة كورنيش النيل بيكون جميل، وهتشوفوا ألعاب نارية في سماء القاهرة، وهتسمعوا صوت أغاني مبهجة جاية من المراكب في النيل.. والجميل إن كل ده مش هيكلفكم كتير.

شارع المعز

بصفة عامة، بتعتبر منطقة القاهرة الفاطمية من أجمل الأماكن اللي تقدروا تتمشوا فيها ليلة رأس السنة، وشارع المعز بيكون مميز جدًا في الليلة دي. المباني التاريخية، الكافيهات اللي موجودة هناك، المحلات، والأضواء المبهرة، والشارع بيتزين بأشجار عيد الميلاد في ليلة رأس السنة، وكمان الخروجة الممتعة دي مش مكلفة ماديًا.

برج القاهرة

في ليلة رأس السنة تقدروا تستمتعوا بالقاهرة الجميلة من فوق برج القاهرة، وتقدروا كمان تستمتعوا بأحلى عشاء في مطعمه الدوار، اللي بيطل على معالم القاهرة الرائعة من فوق، وسعر تذكرة الدخول للمصريين 30 جنيه، والأطفال تحت 6 سنين بدون تذكرة.

الكوربة

منطقة الكوربة في مصر الجديدة من أجمل الأماكن المبهجة اللي هتحسوا فيها بجمال رأس السنة، أشجار عيد الميلاد في كل مكان، المحلات مشغلة أغاني السنة الجديدة، والناس كلها ماشية وهي سعيدة ومبسوطة، حاجة هتخليكم تحسوا براحة نفسية.

وسط البلد

منطقة وسط البلد بتكون غير خالص في ليلة رأس السنة، ألعاب نارية، وأشجار عيد الميلاد، وناس بتعشق الخروج، وكافيهات بترحب بعشاق السهر، ده غير المطاعم اللي بتوفر أكلات جامدة بسعر مناسب.

كل سنة وكل المصريين بخير وسعادة، سنة جديدة سعيدة يا أهل القاهرة!