The Definitive Guide to Living in the Capital , Cairo , Egypt

الهالويين بـ يدق على الأبواب، ومع أن فيه ناس كثير مالهاش في موضوع "خدعة أم حلوى"، ناس ثانية بـ تستغل الفرصة وتلبس ملابس تنكرية مخيفة وتعمل تصرفات غريبة، الفكرة هنا أن اختيار ملابس الهالويين موضوع مش سهل، خصوصًا لو مش عاوز تدفع مبلغ كبير أو تشترى اختيارك من بره مصر.

بس مع شوية مجهود بسيط هـ تقدر تشغّل قدراتك الإبداعية وتبتكر حاجة بنفسك في البيت.. الأفكار كثيرة، من ممثلات مصريات لغاية الأكل، الموضوع سهل يا جماعة.

Jelly Beans

فكرتها تنفع لكل الأعمار من 5 سنين لغاية 92 سنة، فكرة ملابس شنطة الجيلي بينز بسيطة ومضحكة ومبتكرة، كل اللي هـ تحتاجه تشتري شنطة قمامة شفافة، وتعمل فتحات فيها علشان ذراعاتك ورجلك، وبعدين تملأ الشنطة بكمية من البالونات الملونة أو الكرات الصغيرة –على حسب مزاجك– وتكتب على ظهر الشنطة المعلومات الغذائية، أخيرًا اربطها بحزام حول الرقبة وبكده نكون خلّصنا؛ خلي بالكم يا جماعة، فيه شنطة جيلي بينز هربانة في البلد!

تشاندلر بينج

لو كنت من عشاق مسلسل فريندز Friends زي حالاتنا، أكيد الفكرة دي هـ تعجبك، خصوصًا أن كل مكوناتها موجودة في دولابك، أو دولاب والدك. اعمل ملابس الهالويين زي ملك السخرية تشاندلر بينج من قميص زيتونى وصديري بني غامق وبنطلون بني خفيف، قول كام نكتة من نكات تشاندلر بينج وبكده تكون أجمد شخص في المكان.

فريدا كاهلو

باعتبارها واحدة من أهم الفنانات على مر العصور، فريدا كاهلو تعتبر واحدة من أسهل وألطف الناس اللي ممكن تقلدي طريقة لبسهم، كل اللي هـ تحتاجيه بلوزة ملونة وشال عليه ورود وجيبة، وحلق بإطار فضي وشوية سلاسل ملونة، كده ناقص حاجة واحدة ونكون خلّصنا وهي أنك تعملي شعرك ضفاير وترفعيه فوق رأسك، وبعدها تضيفي له ورود صناعية وأخيرًا استخدمي كُحل أسود وارسمي الجزء الواصل بين الحاجبين المميز لفريدا كاهلو.

Men in Black

هي أحسن فكرة لو كنت رايح حفلة الهالويين مع صديقك ومش عاوز وجع دماغ، وبرضه الفكرة دي مش محتاجة مجهود كبير؛ بدلة كلاسيك سوداء، نظارة شمس وممكن القلم اللي استخدموه في الفيلم لمسح الذاكرة، أصل خلينا نتكلم بصراحة، فيه حاجات كثير هـ تحصل يومها ومش عاوزين نفتكرها أبدًا.

Holly Golightly   

ملابس تنكرية أكيد هـ تبهر ضيوف الحفلة، وهي على شرف الشخصية الخالدة من فيلم Breakfast at Tiffany's واللي قامت بدورها العظيمة أودري هيبورن، اختاري فستان أسود بدون أكمام وحذاء أسود بكعب عالي، وقفازات سوداء وعقد من اللؤلؤ، أخيرًا، ارفعي شعرك لفوق وعليه تاج علشان جو الرقي والكلام اللي أنت عارفاه ده.

The Mask

فاكرين لما كل الناس مافيش على لسانهم غير جملة واحدة من فيلم القناع "حد يوقفني" أو "Somebody stop me!"، كانت مرحلة عجيبة من حياتنا مافيش كلام، بس الحقيقة أن ملابس الشخصية تعتبر عبقرية لو قدرت تجمع مكوناتها: قميص أبيض، حمالات، برنيطة صفراء، بنطلون/ بدلة صفراء وأهم حاجة طبعًا كميات من الطلاء الأخضر، كميات كبيرة.

Rosie the Riveter

أطلقي العنان لروحك الأنثوية وقولي للناس أنك تقدري تعملي أي حاجة وتقلدي روزي ذا ريفيتر، كل اللي عليكي تعمليه تختاري قميص جينز لونه أزرق غامق وترفعي أكمامه لغاية كوعك ومعاه بنطلون الجينز المفضل لك، بعدها.. اربطي شعرك بشريطة أو باندانا وارفعيه لفوق وحطّي أحمر شفايف أحمر غامق، وبكده هـ تقدري تتصوري طوال الليل زي ما تحبي.

Colonel Sanders

مين فينا مش بـ يقول عليه كنتاكي أول ما يشوف صورته، "كنتاكي" أو كولونيل ساندرز يعتبر كمان من الشخصيات السهل تقليدها؛ قميص أبيض وبنطلون أبيض ومريلة حمراء وخلص الموضوع، تقدر تطبع شعار كنتاكي على المريلة وتضيف شوية بودرة أطفال لشعرك علشان تقلد شعر الكولونيل الأسطوري، ويا عيني لو كنت ماشي وبـ تأكل قطعة فراخ من الباكيت.

Mary Poppins

حاجة ثانية هـ تحتاجي لدولاب والدتك فيها، وكل اللي هـ تحتاجيه علشان تعملي شخصية ماري بوبينز هي تنورة سوداء طويلة، قميص أبيض، برنيطة سوداء، بابيون أحمر، قفازات بيضاء وشراب أحمر، الفكرة بسيطة إحنا معاكم، بس بـ تضمن لكم ليلة مميزة، اوعي تنسي الشمسية السوداء يا إما مش هـ تعرفي تغني Go Fly a Kite.

Sybill Trelawney

من أول وهلة هـ تشوفيها فكرة معقدة شوية، بس شخصية سيبيل ترلاوني العرافة وأستاذة هاري بوتر في الفيلم نقدر نقلدّها بخطوات بسيطة، بشوية إكسسوارات وربطة رأس وبلوزة غريبة وتنورة طويلة (أو فستان يمشي برضه)، مع شال فوق كتفك وبوت بكعب عالي، بكده تكوني نسخة من السيدة الغجرية في الفيلم، لو عاوزة النسخة الكاملة منها ممكن تضيفي صديري شتوي بياقة وكأس شاي عتيق ونظارات نظر مدورة وتسريحة شعرها المميزة.

عبلة كامل

واحدة من أكثر الأفكار المطرقعة معانا، عبلة كامل هي واحدة من أجمد وأشهر الممثلات في مصر، كل اللي عليكي تختاري جلابية مصرية عادية وتعملي شعرك كحكة وتلبسي أكبر كمية تقدري عليها من الذهب، كل ما دوشة الذهب تكبر يكون أحسن.

سعاد حسني

مصر طوال عمرها بـ تقدم نجوم وفنانين كبار، بس عدد قليل منهم قدر يوصل للمكانة اللي حققتها الراحلة سعاد حسني، علشان تتحولي للفنانة العظيمة، دوّري على فستان منقط أسود، وبرنيطة كبيرة وحذاء بسيط بكعب عالي، ممكن كمان تدخلي في الشخصية أكثر وتقلدي ماكياج سعاد حسني بأحمر شفايف أحمر غامق وتكحّلي عينيكي بالأسود الثقيل.

Delivery Guy 

فكرة ثانية في منتهى السهولة، مافيش أسهل من أنك تلبس زي رجل توصيل الطلبات، دوّر على كاب وقميص بولو، وبس خلاص، لو كنت ملتزم أوي يعني بالشخصية، ممكن تروح ومعاك علبة بيتزا أو فراخ، روح الحفلة على موتوسيكل طالع عينه علشان تعمل دخلة مبهرة.

Mr. X

عاوز تثبت أن "أسطورة مستر إكس مالهاش نهاية" بجد؟ فكرة ثانية مطرقعة معانا بس عبقرية بجد، وفكرتها مستوحاة من الفيلم المصري "أخطر رجل في العالم"، وتقليد الشخصية الكوميدية المعروفة مستر إكس بسيط جدًا ومبتكر، هـ تحتاج بدلة بيضاء وكرافتة بيضاء وبرنيطة بيضاء وقميص أسود، أخيرًا، اوعى تنسى نظارة الشمس والشنب الرفيع والنظرة المخيفة.

الشبح

لو مش عاوز لخبطة، عندك أقدم حاجة في التاريخ: الشبح.