The Definitive Guide to Living in the Capital , Cairo , Egypt

القاهرة فيها مشاكل كتيرة.. ما حدش يقدر ينكر ده.. لكن في المقابل فيها حاجات حلوة كمان.. ومن الحاجات دي المبادرات الجديدة اللي بتحاول تخلي القاهرة أجمل وبتحاول ترجع للعاصمة شكلها الحضاري اللي تاه وسط الزحام والعشوائيات..

في الموضوع ده جمعنا لكم أحلى 4 مبادرات بتحصل في القاهرة الفترة دي.. والغريب بقى أنها مبادرات حكومية.. يعني الحكومة هي اللي عاملاها.. وده بيثبت أن الحكومة لو قررت تعمل حاجة كويسة هتقدر تعملها.

قاهرة بلا كارو

المبادرة دي هدفها التخلص من عربيات “الكارو”، علشان القاهرة تبقى أجمل.. والمبادرة اللي بتقوم بيها محافظة القاهرة، فكرتها شن حملات لمصادرة لعربيات الكارو من الشوارع واستبدالها بـ “تروسيكل” أو عربية نصف نقل، كوسيلة للحفاظ على مظهر الشوارع الحضاري.

والمبادرة دي بتتنفذ في جميع الأحياء، والحكومة عملت لقاءات مع أصحاب العربيات “الكارو”، وطلبت منهم يسلموها لأجهزة الحي، واستبدالها بتروسيكل، مع تسليم الحمار أو الحصان اللي كان بيحرك العربيات دي لجمعيات الرفق بالحيوان.

زراعة أسطح العمارات

دي مبادرة هايلة أطلقتها محافظة القاهرة، للتخلص من مخلفات أسطح العقارات مجانًا، وبعد كده زراعتها، زي ما بيحصل في كثير من الدول العربية والأوروبية، وبتقوم أجهزة أحياء العاصمة بتنظيف حوالي 10 أسطح في الشهر، في كل حي من أحياء القاهرة مجانًا، وبعدها بتزرع الأسطح دي.

تطوير الأكشاك

دي مبادرة جميلة، بتقوم بتطوير شكل الأكشاك اللي في القاهرة، واعتمدت المحافظة شكل “القبة”، علشان يتواكب مع شكل الأكشاك في الأحياء التاريخية، كمان المنظومة دي بتقوم بإزالة جميع الأكشاك غير المرخصة، واللي بتشوه المظهر الحضاري للشوارع، وبتسرق التيار الكهربائي من أعمدة الإنارة، وبتعيق حركة الأرصفة في الشوارع والميادين الرئيسية.

الأكشاك الموسيقية

دي بقى مبادرة آخر دلع! بدأت في حي المعادي، كوسيلة للترفيه، وفكرتها نشر أكشاك بتعزف فيها مقطوعات موسيقية من أرقي الأغاني العربية والأوروبية، وقريب هتتنفذ الفكرة دي في حي عابدين، وبالتحديد في شارع الشريفين، اللي تم تطويره ضمن مشروع القاهرة الخديوية، كمان هتنظم في الشارع ملتقيات فكرية وثقافية.

ده غير مبادرات سكتك خضرا وخليك زي آدم والرصيف حق للمشاة ومبادرات تانية سبق وكلمناكم عنهم في الموضوع ده.