The Definitive Guide to Living in the Capital , Cairo , Egypt

بعد أيام قليلة وبالتحديد نهاية شهر سبتمبر هيتم افتتاح الحديقة المركزية في الشيخ زايد واللي كتير من سكان أكتوبر منتظرينها، في السطور الجاية هنعرفكم أكتر على الحديقة المميزة دي.

الحديقة بتقع على مساحة 65 فدان، ضمن منطقة تجارية إدارية ترفيهية بإجمالي مساحة 143 فدان، وهيكون فيها مساحات خضراء، وأشجار، وممرات للمشاة، ومسارات للعجل، ومطاعم، وكافيتريات، وبحيرات صناعية، ونوافير مضيئة، وشلالات مياه متنوعة، وأكشاك، ودورات مياه، ومبني إدارة، ومواقف انتظار للعربيات.

اللي صممها هو الدكتور ماهر استينو واللي صممها على غرار الحدائق العالمية، وهو الذي صمم حديقة الأزهر، ونفذت شركة سامكريت الأعمال تحت إشراف جهاز مدينة الشيخ زايد، وهيئة المجتمعات العمرانية الجديدة.

وبحسب بيان لجهاز تنمية مدينة الشيخ زايد، فالمشروع بيتكون من محور رئيسى فيه 7 نافورات، ومحور ثانوى فيه نافورة رئيسية و3 نافورات صغيرة وشلال، بجانب بحيرة بمساحة 2.5 فدان بتضم نافورة عايمة وشلالين، وبتحيط بمطعم الجزيرة اللي هيخدم حوالى 80 فرد فى صالة مغلقة بتطل على البحيرة بمسطح 350 م2، ومنطقة طعام خارجية على البحيرة هتخدم حوالى 85 فرد بمسطح 350 م2، وبيتوسط المطعم نافورة وشلال بيربطها بالبحيرة.

كمان المطعم الرئيسى بيمثل أعلى نقطة ارتفاع بالحديقة، وده هيتيح لكم فيو مبهر على الحديقة بالكامل، والمطعم بيضم نافورة محورية بتنتهى بالشلال والبحيرة الصناعية، وهيخدم حوالى 85 فرد داخل صالة المطعم ومنطقة طعام خارجية هتخدم حوالى 150 فرد بمسطح 600 م2 بيتوسطها النخل والأشجار والشجيرات، وملحق به مبنى للوجبات السريعة ومنطقة مكشوفة قدامها بتخدم حوالى 70 فرد.