The Definitive Guide to Living in the Capital , Cairo , Egypt

الصورة الرئيسية: Evelina Friman

لأنها “ليلة العمر” فلازم تكون مميزة ومبهجة، وعلشان كده هي حلم كل شاب وفتاة، ودائمًا المقبلين على الزواج بيدوروا باهتمام كبير على أفضل اختيارات علشان تكون ليلة زفافهم هي “ليلة العمر”، ولكن دايمًا بيكون فيه حيرة ما بين الطرفين واختيارات مختلفة وتخيلات جنونية لأجمل ليلة لكل عروسين بيفرحوا فيها وسط الأهل والأصدقاء، وأهم اختيار بيكون “القاعة” علشان دايمًا الناس بتدور على قاعات مميزة ومختلفة، وعلشان كده النهاردة هنرشحلكم 5 قاعات أفراح في القاهرة هتبهركم في ليلة العمر.

 

قاعات نايل ريتز كارلتون

لو أنتم من هواة الأناقة وعندكم ميزانية مميزة لليلة العمر فأكيد بنرشحلكم فندق نايل ريتز كارلتون كورنيش النيل، اللي بيقدم باقة مميزة من الديكور والمعدات والتنظيم وكمان ليلتين مجانًا للعروسين وغرفة تحضير للفرح وكعكة زفاف 5 أدوار وعشاء خاص للعروسين، وهما عندهم أكثر من قاعة؛ “ألف ليلة وليلة” سعة 600 فرد، “القاهرة” 1200 فرد، أما القاعة الخارجية “جاردن سيتي” فبتسع 1000 فرد.

بالنسبة للأسعار فبتبدأ من 3000 حتى 3500 لضيف وده على حسب عدد الضيوف، والحجز عندهم لازم يكون قبلها بفترة كبيرة لأن القاعات دايمًا محجوزة.

بحيرة القاهرة

هتستمتعوا في بحيرة القاهرة بالأجواء الفاطمية والخديوية وهتعملوا فرح بمنطقة الفسطاط القديمة، والقاعة بتسع من 300 حتى 700 فرد، وبيكون معاها الديكورات والتجهيزات والطعام وتقديمه وكل ده بسعر يتراوح ما بين 320 وحتى 370 ألف جنيه.

القلعة

ومن الفسطاط لقلعة صلاح الدين تقدروا تحجزوا قاعة أفراح داخل أهم معالم القاهرة الإسلامية من القاعات المتوفرة زي دار الدرب والي بتسع 300 شخص، وقاعة بئر يوسف لـ500 فرد، وقاعة متحف الشرطة 700 فرد، وأكبرهم ساحة المحكى في الهواء الطلق تسع 900 فرد، وبيقدموا باقات تشمل إقامة الفرح والديكور وإعداد المكان وتقديم الطعام وخلافه بأسعار تبدأ من 110 ألف جنيه وتصل لـ360 ألف جنيه.

أمريكان جاردن هول

لو بتدوروا على التميز والرقي يبقى القاعة الزجاجية المطلة على الحديقة هو اختياركم في أمريكان جاردن هول، وكمان فيه قاعات تانية داخلية مختلفة، وبيقدموا باقة فيها جناحين للعروسين لاستعدادات الفرح، وتقديم الطعام والديكور والأجواء وخلافه، وبتسع القاعة الزجاجية 300 فرد والأسعار تتراوح ما بين 100 و150 ألف جنيه حسبب عدد الضيوف، وبيكون الحجز في أمريكان جاردن هول قبل الفرح بـ3 شهور على الأقل.

فارم لودج

داخل مجمع أحمد عرابي في طريق الإسماعيلية موجود فيلا فارم لودج وهي عبارة عن مكان داخل مزرعة وبيتم عمل الحفلات داخلها على الطابع الريفي، وسعة الفيلا 350 شخص والباقة بتشمل جناح للعروسين ومطبخ في الهواء الطلق وشوايات وحمامات سباحة وموقف سيارات وخدمة تقديم الطعام والديكور وخلافه، وبيكون سعر الباقة من 40 فرد حتى 200 فرد 160 ألف جنيه، وإن كان العدد أكثر من ذلك تكون القاعة بـ180 ألف جنيه.