The Definitive Guide to Living in the Capital , Cairo , Egypt

بالتأكيد كان عندنا فكرة مبدئية عن أن قصة تأسيس أكبر سلسلة مطاعم في العالم، بالتأكيد هتكون قصة شيقة، لكن الفيلم قدر يحتفظ بالعديد من الأسرار والخفايا داخل أحداثه، علشان يفاجئنا بها أثناء المشاهدة وتزيد متعتنا، وفى نفس الوقت فشل الفيلم في اللعب على بعض الأوتار اللي كان ممكن يلعب عليها أفضل من كده.. خلينا نتكلم أكتر في التفاصيل.

فيلم The Founder من إخراج جون لي هانكوك، ومن تأليف روبرت دي سيجال، ومن بطولة مايكل كيتون وكارا مانتيللا مع ستيف كولتر وبي جي نوفاك، بالاشتراك مع لورا ديرن وجون كارول لينش.

الفيلم المقتبس عن قصة حقيقية بيحكي عن قصة صعود رجل الأعمال راي كروك اللي بيقوم بدوره مايكل كيتون، وإزاي قدر يسيطر على مطعم برجر صغير باسم ماكدونالدز، ويحوله من مجرد مطعم محلي لأكبر سلسلة مطاعم في العالم، على الرغم من كونه مجرد شريك ومش المؤسس الفعلي لسلسلة المطاعم.

المميز في سيناريو الفيلم كانت قدرته على عرض المشكلات اللي بتواجه راي كروك وطريقته في التغلب عليها، أروع ما في السيناريو كان مشاهد الصراع والمشاكل والخناقات بين كوك وبين الأخوين ماكدونالدز.

لكن زي ما لكل شيء إيجابي ناحية سلبية، كان بيعيب السيناريو البطء الشديد في مشاهد راي في المنطقة اللي مش بيصارع فيها من أجل سلسلة المطاعم، زي علاقته بزوجته أو مثلًا محاولة الترويج لمنتجاته في بداية الفيلم.. وفرق السرعة بين مناطق السيناريو كان من النقاط اللي بنعيبها على الفيلم.

الأداء التمثيلي كان متميز في مجمله، لكن مايكل كيتون لم يكن في أفضل حالاته، وشوفنا منه أداء تمثيلي في أدوار تانية كانت تعتبر أقل من الدور الحالي لكنها كانت أقوي وأكثر تأثيرًا على مستوى الأداء التمثيلي، لذلك نعتقد أن كيتون مش هيترشح لأفضل ممثل في الأوسكار، على الرغم من توقيت عرض الفيلم اللي بنعتقد أنه بيغازل فيه الجائزة الأشهر في عالم الأفلام.

الموسيقي التصويرية كانت ضعيفة وغير مؤثرة، ولم تقدم أي جديد أو حتي تعلق في أذهاننا وتجبرنا على البحث عنها بعد نهاية الفيلم، على العكس من الديكورات اللي قدرت تنقلنا لعالم الفيلم الزمني، أيضا اختيار الملابس وموديلات السيارات كان مافيهوش غلطة، وكل ده أدى لانتقالنا زمنيًا لعالم الفيلم، وده أكيد شيء مميز ويحسب للفيلم.

فيلم The Founder فيلم جميل لو هتشوفوه خارج دائرة توقعات الأوسكار، لأنه في رأينا مش هيقدر ينافس على الجائزة.

علشان تبقي عارف: قام النجم (مايكل كيتون) بأخذ بعض دروس عزف البيانو استعدادًا للفيلم؛ وهذا بعد اكتشافه أن (راي كروك) الحقيقي كان شغوفًا بالعزف على البيانو.