The Definitive Guide to Living in the Capital , Cairo , Egypt

أفلام أنيميشن كتيرة بتتناول الأطفال الجدد، والعلاقة بين الأهل والأطفال والعلاقة بين الأطفال الجدد وبين أخواتهم، وعلاقة الغيرة اللي ممكن تحصل نتيجة اهتمام الأهل بالمولود الجديد أكتر من الطفل الأكبر سنًا. لكن الميزة الأساسية في فيلم The Boss Baby أنه بيتجاوز كل ده وبيقدم صورة خيالية معقدة وظريفة عن طريقة تصور طفل صغير لأخيه الأصغر واللي بيدخل حياته وبيغيرها.

القصة

فيلم The Boss Baby بيحكي عن طفل صغير عايش حياة مثالية مع والده ووالدته، وبيهتموا به ويراعوه إلى أقصى حد، وبيشاركوه كل تفاصيل حياته بداية من استيقاظه من النوم ولعبه، حتى نومه في نهاية اليوم. لكن الأمور بتنقلب رأسًا على عقب لما بيخبروه باقتراب وصول شقيق له، ولما بيوصل فعلًا وبياخد كل حنان وحب واهتمام الأب والأم… بتبدأ الأحداث تاخد منحنى غريب ومختلف.

فريق العمل

فيلم The Boss Baby من إخراج توم ماكجراث ومن تأليف مارلا فرازي، ومن بطولة الأداء الصوتي لـ أليك بالدوين وستيف بوشيمي وليزا كودرو وتوبي ماجوير.

السيناريو والحوار

سيناريو فيلم The Boss Baby كان معتمد على فكرة تقبل الأهل للامعقول، ومن ثم بيبدأ في تفسير الأمر من عدة زوايا، ومن هنا بيصحب المشاهد في سكة من الاندهاش وعدم التصديق في البداية، ثم بيبدأ المشاهد في الانسجام مع الأحداث علشان يوصل للتفسير المناسب مع استمرار أحداث الفيلم.

أما الحوار في الفيلم فكان على مستوى عالي من الذكاء والحنكة، وقدر يوصل لنا انفعالات أبطال الفيلم بشكل رائع، وطبعًا الحوار كان هيكون بلا قيمة بدون القدرات التمثيلية بالصوت واللي كانت مميزة وواضحة في كل الأبطال وخصوصًا إليك بالدوين، اللي قدر يقوم بدور الـ Boss Baby بأفضل ما يكون.

الإخراج

إخراج الفيلم المتميز ساعد على دخول المشاهدين للأحداث بسهولة، وقدرنا ننسجم مع الأحداث، ونتقبلها بسرعة، ونعيش معاها لمدة حوالي ساعتين هي مدة عرض الفيلم. وده نتيجة الإخراج المحكم القادر على تقديم فيلم أنيميشن يعجب الصغار والكبار على حد سواء.

الموسيقى والتحريك

الموسيقى التصويرية كانت عادية، وكان نفسنا تكون أكثر قوة علشان تتناسب مع مستوى قوة The Boss Baby لكن للأسف كانت تقليدية وبتعزف على نفس المستوى من بداية الأحداث لنهايتها، بدون محاولة للتميز أو المنافسة مع باقي عناصر الفيلم.

على العكس منها تمامًا بنشوف التحريك في الفيلم (وهو طريقة تحرك الشخصيات الكرتونية) كان رائع وسلس وسهل، كمان ألوان الفيلم وتفاصيله كانت غنيه ومبهرة للعين إلى أقصى درجة.

الخلاصة

فيلم The Boss Baby بيقدم أنيميشن جميل، ينفع يشوفه الكبار والصغار على حد سواء. وننصح بمشاهدته لمحبي أفلام الأنيميشن.

علشان تبقى عارف:

الفيلم يعتبر أول عمل يتعاون فيه النجمان (أليك بالدوين) و(ليزا كودرو) منذ تعاونهما في مسلسل (Friends).