The Definitive Guide to Living in the Capital , Cairo , Egypt

قصة الفيلم

فيلم Smurfs بيبدأ بمشاهد افتتاحية بتعرفنا بمجموعة السنافر، والاختلاف في الشخصيات بين كل واحد منهم. فمثلًا بنشوف السنفور الطيب لدرجة السذاجة، والسنفور المفكر، والغاضب، والمغرور.. إلخ. بعدها بنتعرف على كبير السنافر، اللي بيعرفنا بدوره على السنفورة الأنثى الوحيدة في قرية السنافر. وهى مش بس الأنثى الوحيدة، هي كمان السنفورة الوحيدة اللي مش معروف لها صفة محددة. ومن هنا بتبدأ أحداث الفيلم، لما بيحاول أحد السنافر يعمل تجربة على السنفورة علشان يعرف طبيعتها بالظبط.

بعد كده بياخدنا الفيلم لحالة مستمرة من المغامرات ضد الساحر الشرير. اللي بيحاول يسيطر على السنافر علشان يستغل طاقتهم ويبقى أقوى ساحر في العالم.

فريق العمل

الفيلم من إخراج كيلي إسبوري ومن تأليف باميلا ريبون. أما الأداء الصوتي فكان من نصيب راين ويلسون وداني بودي وجو مانجانيلو وديمي لوفاتو.

الإخراج والمؤثرات

إخراج الفيلم اعتمد على تقديم سلسلة لا تنقطع من المفاجآت، من أول مشهد لآخر مشهد. والتنوع في المفاجآت ده مش موضوع سهل زي ما ناس كتير بتتخيل، على العكس بيحتاج تضافر بين السيناريو والإخراج والمونتاج. بالإضافة للمؤثرات الخاصة والقدرات على التحريك وغيرها من عناصر بناء أفلام الأنيميشن.

السيناريو والأداء الصوتي

زى ما قولنا السيناريو الخاص بالفيلم كان قوي جدًا ومترابط، وقائم على فكرة أن كل مشهد بيسلمنا كمشاهدين –سواء الكبار أو الصغار- للمشهد التالي بسهولة وسرعة.

الموسيقى والتحريك

الموسيقى التصويرية كانت من عيوب الفيلم، وحسينا أنها غير مميزة، أو بمعنى أصح مش بنفس قوة الفيلم والسيناريو والإخراج. لكن تحريك الشخصيات على الشاشة كان بيمتاز بالقوة والإنسيابية، وكان واحد من أقوى عناصر الفيلم.

الخلاصة

فيلم Smurfs فيلم أنيميشن متميز، معتمد على حياة السنافر الغنية بالتفاصيل. والمميز في الفيلم أنه صالح للمشاهدة من الكبار والصغار على حد سواء.

علشان تبقى عارف: السنافر (جمع سنفور) (بالفرنسية: Les Schtroumpfs)، (بالإنجليزية: The Smurfs) هي شخصيات خيالية صغيرة الحجم، زرقاء اللون، وتعيش في الغابة، ابتكرها الرسام البلجيكي بيير كوليفورد.