سنة 1979 قدمت هوليود فيلم عن مجموعة من الرجال الكبار في السن بيقرروا سرقة بنك، الفيلم كان اسمه Going in style، وحقق نسبة مشاهدة ممتازة نتيجة حالة التعارض بين أعمار الرجال الكبار في السن وبين المهمة اللي بيسعوا لها. وده كان مصدر الكوميديا الأساسي في الفيلم.
اليوم وبعد حوالي 38 سنة، بتعيد هوليوود تقديم الفيلم من جديد بحذافيره تقريبًا… ويبدو أن النجاح هيكون من نصيبهم المرة دي أيضًا!
فريق العمل
فيلم Going in Style من إخراج زاك براف ومن تاليف تيودور ملفي، اقتباسًا عن الرواية الأصلية اللي كتبها مارتن بريست. أما البطولة كانت من نصيب مورجان فريمان ومايكل كين مع آلان أركين. والحقيقة أن الأبطال الثلاثة من أقوى وأجمد الممثلين في زمانهم.
القصة
الفيلم بيحكي عن 3 رجال كبار في السن، بيطلعوا للمعاش من وقت طويل، وبيعيشوا اعتمادًا على حساباتهم البنكية اللي بيتم وضع أموالهم فيها كل شهر. لكن بسبب ما الأموال دي مش بيتم إيداعها أكتر من كده، وبيبدأوا يعانوا من الفقر، ثم بيكتشفوا أن البنك هو اللي سرق فلوسهم، ومن ثم بيقرروا إنهم يسرقوه ويستولوا على أموالهم بالقوة… بس إزاي؟!
الإخراج
الحقيقة أن الإخراج لم يقدم جديد. كل اللي حصل أنه اقتبس الفيلم القديم وأعاد تقديمه من جديد مش أكتر. لكن لا يمكن نتجاهل فكرة السهل الممتنع اللي قدر الفيلم يقوم بها، وإزاي قدر يوازن ما بين تقديم قصة كوميدية سهلة وخفيفة، وفى نفس الوقت تكون القصة دي غير هزلية، وقوية وقادرة على جذب المشاهد لها كقصة منفصلة بذاتها عن الأحداث الكوميدية.
الأداء التمثيلي
بما إننا بنتكلم عن 3 نجوم كبار بحجم أبطال الفيلم، فالأداء التمثيلي كان أكتر من رائع، والكوميديا كانت غالبة على النصف الأول من الفيلم، لكنها بتتراجع بعد ذلك علشان تسيب الفرصة لأحداث الفيلم العادية بالتدفق حتى نهاية الأحداث.
الموسيقى والديكور
من الأمور المميزة في الفيلم كانت الموسيقى الحماسية واللي تم توظيفها بشكل رائع على مدار أحداث الفيلم، لكن الديكورات لم تكن بنفس قوة الموسيقى على الإطلاق، وشعرنا إنها كانت محتاجة تكون أقوى وأكثر تركيزًا على خدمة الأحداث.
الخلاصة
فيلم Going in style بيقدم جرعة كوميدية متميزة لنجوم كبار ولهم وزنهم. ويصلح لمشاهدة رائقة في أجازة نهاية الأسبوع.
علشان تبقى عارف:
الفيلم يعتبر سادس تعاون بين النجميّن الكبيريّن (مورجان فريمان، ومايكل كين).
