The Definitive Guide to Living in the Capital , Cairo , Egypt

عيش كل يوم في حياتك كأنه آخر يوم.. ساعد الناس وحبهم وخليك بتشكل فارق في المجتمع والأسرة اللي أنت عايش فيها كأن الحياة هتنتهي بكرة، بالتالي كل المطامع الشخصية وكل أفعال الشر بتكون غير مؤثرة وبلا قيمة.

هي دي الفكرة اللي قدمتها الروائية لورين أوليفر واللي تم تحويلها لفيلم بيحمل نفس الاسم من إخراج  ري روسو يونج ومن بطولة زوي ديوتش وهلستون سيج مع إيلينا كامبوريس وإليسا لينش.

الفيلم بيحكي عن سامنثا كينجستون اللي بتتعرض لظاهرة غريبة، وهي أن يومها بيعيد نفسه مرة بعد مرة، وأنها في كل مرة بتموت فيها أو تحصل لها حادثة بتصحى على أحداث نفس اليوم وهي بتعيد نفسها بالتفصيل الممل!

فكرة الفيلم وقصته مش جديدة علينا، شوفناها قبل كده في أفلام زي Groundhog Day أو حتى الفيلم العربي ألف مبروك من بطولة أحمد حلمي.

وبما أن القصة مش جديدة، فكان تركيزنا هنا على الأداء التمثيلي والخدع السينمائية والسيناريو. ولازم نقول أن سيناريو الفيلم وقعنا في بعض الملل، لكن لو هنقارنه بالملل اللي أصابنا أثناء مشاهدة فيلم ألف مبروك مثلًا، يبقى فيلم Before I fall هينتصر بالضربة القاضية.

الأداء التمثيلي للأبطال كان جيد، وقدروا يقوموا بدور فتيات الثانوية واللي بيعيشوا ما بين مراهقة بتخلي تصرفاتهم مائلة للانحراف والجنون، وبين محاولة بطلة الفيلم أنها تتجنب مصيرها اللي بيعيد نفسه ليلة بعد ليلة.

عجبنا في الفيلم اختيار الملابس والديكورات اللي نقلتنا لعالم الفيلم بسهولة، لكن الموسيقى التصويرية كانت محتاجة تكون أقوى. وحسينا أنها غير ملائمة للجو العام للأحداث.

على الرغم من العظة والعبرة اللي بيحملها فيلم Before I Fall إلا أن تكرار مشاهدتنا للفيلم بأكثر من نسخة جعلتنا متوقعين وحافظين أحداثه.

علشان تبقى عارف:

قامت كل من (زوي دويتش) و(هالستون سيج) من قبل بالمشاركة في فيلم مقتبس عن رواية، فشاركت اﻷولى في فيلم Vampire Academy، والثانية في Paper Towns.