The Definitive Guide to Living in the Capital , Cairo , Egypt

النجم العالمي سيلفستر ستالون هيزور مصر الشهر ده. وده اللي أكده لكايرو 360 “وليد البطوطي” مستشار وزير السياحة، واللي أكد لنا أن زيارة ستالون هدفها عمل دعاية لمصر.

سيلفستر هيزور أهرامات الجيزة وشارع المعز وهيتصور كمان عند كوبري قصر النيل، الجميل إن سيلفستر هيكون معاه أسرته، يعني مش هيكون لوحده، ودي أكبر دعاية لمصر. 

وبمناسبة الزيارة الخاصة دي، حبينا في كايرو 360 نقول لكم على أشهر 5 أفلام لسيلفستر ستالون لازم تتفرجوا عليهم:

Rocky

الملاكم اللي لسه جديد في اللعبة “روكي”، بتجيله فرصة العمر في إنه يلاعب الملاكم بطل الوزن الثقيل “أبولو كريد”. صحيح مش بيفوز بالماتش لكن بيقدر يوصل لمرحلة كبيرة في تحقيق ذاته. وطبعًا لازم تتفرجوا على باقي الأجزاء بتاعته (6 أجزاء).

First Blood

ممكن تستغربوا من اسم الفيلم ده، بس هتتفاجأوا لما تعرفوا إنه الجزء الأول من سلسلة أفلام “رامبو” المشهورة. وفيه المقاتل “جون رامبو” بيكون مُحاصَر في بلد صغير بيحكمها عمدة مستبد مع مجوعة من أعوانه. وبيضطر يستخدم مهاراته القتالية علشان يقدر يهرب. الفيلم اتعمل منه 3 أجزاء تانية.

Judge Dredd

القاضي “دريد” هو المسؤول في المستقبل عن الحفاظ على النظام في المدينة. لكن بيتم اتهامه بجريمة هو مارتكبهاش. وبيحاول يثبت برائته ويدور على الجاني. الفيلم اتعمل منه جزء جديد عام 2012 بعنوان “Dredd”، بطولة “كارل أوربان”.

The Expendables

يمكن ده من أكتر الأفلام اللي عملت قلق لما اتعرضت، لأنه قدِم مجموعة كبيرة من نجوم هوليوود مع بعض. وبيدور عن عميل في الـ CIA بيأجر مجموعة من المرتزقة، علشان يقوموا بتصفية ديكتاتور لاتيني. كان عميل CIA سابق. الفيلم اتعمل منه جزئين كمان، وفي كل جزء عدد النجوم بيزيد.

Escape Plan

خبير متخصص في اختبار مدى قوة ومناعة السجون ضد الهرب، بيلاقي نفسه محجوز في سجن على درجة عالية من الحماية. فبيضطر يستخدم مهاراته في الهروب بمساعدة واحد من زملائه.

يا ترى إيه أكتر فيلم شوفتوه وعجبكم لسيلفستر؟