The Definitive Guide to Living in the Capital , Cairo , Egypt

في ليالي الصيف الطويلة، مافيش أحلى من أنك تقلل درجة التكييف على أقل حاجة علشان تحس برعشة البرودة الجميلة. لكن الأفلامجية مدمنين الـ Movie nights عارفين رعشة تانية مش بسبب درجة الحرارة.. بسبب الرعب اللي بنشوفه على الشاشة.

علشان كده بنقدم لكم خمس أفلام من أقوى أفلام الرعب في 2022. تنسيكم طعم النوم، وتخليكم مشتاقين لحرارة الصيف من تاني!

الخامس: YOU WON’T BE ALONE

فيلم YOU WON’T BE ALONE بينتمي لأفلام الرعب الفلسفي، من خلال رحلة فتاة شابة، تم تحويلها لساحرة، ومحاولتها علشان تكتشف طبيعة الحياة كإنسانة. المغامرة اللي بتخليها تعيش حياة غريبة. مع مشاهد مرعبة الى أقصى حد، لعبت فيها الكاميرا دور البطولة من خلال تصويرها للأشخاص من منظور الرائي. جعلت YOU WON’T BE ALONE فيلم للكبار فقط. نتيجة معظم مشاهده، والفكرة المرعبة اللي بيتناولها.

الرابع: Prey

فيلم Prey بينتمي لتيمة الرعب من الخصم فائق القدرات، الخصم ده بيواجه مقاتلة مخضرمة من قبيلة عايشة على الصيد، وبيكون عليها  أنها تواجهه بأسلحتها البدائية، بينما هو بيملك قدرات خارقة للطبيعة.

بيمتاز Prey بالتصوير في أماكن جديدة ومختلفة، مع استخدام ذكي للمؤثرات الخاصة، كل ده في جو من الرعب والأكشن مش بيسيب للمشاهد ثانية يلتقط فيها أنفاسه.

الثالث: X

تيمة الرعب المعتمدة على أن أخر شخص ممكن نشيل همه في الفيلم، هو مصدر الرعب الحقيقي. شوفنا التيمة دي أكتر من مرة في أفلام زي DON’T BREATHE، والنهرده بنشوفه في قصة مجموعة بتقرر تصور فيلم للكبار فقط في ريف تكساس، علشان يفاجئوا بمجموعة أحداث مرعبة بتخلي كل أملهم في الدنيا، هو الاحتفاظ بحياتهم من خطر مرعب يتخطى حدود المنطق.

فيلم X للكبار فقط نتيجة بعض مشاهده وتيمة الفيلم بشكل عام.

الثاني: Hellbender

فيلم Hellbender بينتمي لتيمة رعب، عمرها ما فشلت أنها تثير الهلع في نفوس المشاهدين. الرعب المعوي المعتمد على المشاهد الدموية، واللي بتجبرنا أحيانا على أننا نغمض عنينا في مشاهد معينة.

 Hellbender بيحكي عن أعمال سحرية قديمة كانت بتحصل زمان جدا، لكن لسه لها أثر شنيع على أسرة مسالمة بتبدأ تكتشف أنها مصدر لعنة مرعبة. لا تسقط بالتقادم.

الأول: The Innocents

يستحق The Innocents المركز الأول معانا، لأنه بيلعب على تيمة بترعبنا كلنا: تيمة الأطفال الأبرياء الظرفاء، اللي بنكتشف مع الوقت والأحداث أنهم أبعد ما يكون عن الظُرف واللطف!

The Innocents بيحكي عن مجموعة أطفال بتمر بيهم سلسلة من الأحداث المرعبة، اللي مش بس بتأثر عليهم، دي بتاخد أهلهم كمان في دوامة من الأحداث المرعبة والغير متوقعة.

The Innocents بيوظف الخدع السينمائية بذكاء، وبيعتمد في الرعب الخاص بيه على أن أبطاله مش نجوم مشهورين، بالتالي شعورنا بالرعب بيكون مضاعف، وشعورنا بحقيقية الأحداث بيكون أكبر.