The Definitive Guide to Living in the Capital , Cairo , Egypt

الهالوين أو عيد الهلع، يعتبر مناسبة ممكن يتجمع فيها عدد كبير من الأصحاب، أو القرايب مع بعض. ومع بداية فصل الشتاء واقتراب الليل. بيكون من الممتع جدًا تقضية السهرة أمام مجموعة من الأفلام المرعبة واللي تجمد الدم في العروق حرفيًا… لكن ياترى هنتفرج على إيه؟

بنقدم لكم مجموعة من  الأفلام اللي اختارها لكم محرر كايرو 360 علشان تقضوا سهرة ممتعة ومختلفة ومستحيل تنسوها.

The Haunting of Hill House

من أحدث أعمال الرعب اللي تم طرحها مؤخرًا. ولو كنتم مشتركين في خدمة Netflix يبقى ننصحكم بتمضية الليل أمام واحد من أقوى الأفلام اللي بتتناول فكرة المنازل المسكونة والأحداث الغير عادية اللي بتدور فيها.

It

فيلم رعب حقق شهرة عالية جدًا وإشادة واسعة على مستوى النقاد أو المشاهدين. عن مجموعة من الأطفال بيحاولوا يكتشفوا لغز دفين عايش معاهم. لكن المواقف اللي بيمروا بيها تعتبر قمة في الرعب وحبس الأنفاس.

Annabelle

البنات اللي بتحب تتفرج على التليفزيون وهي حاضنة العروسة بتاعتها. نعتقد أنه بعد مشاهدتهن للفيلم ده هيعيدوا التفكير ألف مرة قبل ما يعملوا كده.. واحد من أكتر الأفلام المرعبة اللي بتلعب على وتر العروسة المسكونة بروح شريرة.

The Conjuring

واحد من أشهر أفلام الرعب في التاريخ. ونجاحه الكبير حوله لسلسلة من الأفلام طيرت النوم من عيون المشاهدين لوقت طويل. وبيصاحب كل جزء جديد دعاية مكثفة ومبتكرة.. مشاهدتكم للفيلم على مسئوليتكم الخاصة.

Paranormal Activity

واحد من أشهر أفلام الرعب. والسبب الأكبر في شهرته هو أنه من أوائل الأفلام اللي قدمت طريقة تصوير مبتكرة، بمعنى أننا هانتفرج على أحداث الفيلم من خلال مجموعة كاميرات مراقبة بيثبتها شخص شاكك في بعض الأحداث المريبة اللي بتحصل في منزله.

Hotel Transylvania

لو هتقضوا الهالوين مع أطفال صغيرة. ممكن نوصل لحل وسط. فيلم أنيميشن مرعب. لكن الرعب بتاعه مش من النوع اللي ممكن يأثر على نفسية الأطفال أو يضايقهم. علشان كده كان لازم (فندق ترانسلفيانيا) يكون ضمن قايمتنا.

The Cabin in the Woods

واحد من أنجح أفلام الرعب في التاريخ. وبيضم مجموعة من أشهر، وأشرس، وأرعب الشخصيات اللي ممكن تشوفوها في حياتكم. لو حابين توصلوا المتعة لأقصى درجاتها ننصحكم بتعلية صوت الساوند سيستم عندكم لأقصى درجة!

The Exorcist

على الرغم من إنه فيلم قديم شوية –إنتاج السبعينات- لكنه واحد من أهم وأقوى أيقونات أفلام الرعب في هوليوود على مر التاريخ. وواحد من  الأفلام اللي أثروا على المشاهدين – وإحنا منهم – لوقت طويل. علشان كده بننصحكم بمشاهدته بحذر شديد وفي غياب الأطفال أو المشاهدين اللي قلبهم ضعيف تمامًا.

The Omen

على الرغم من الأبعاد السياسية اللي بيناقشها الفيلم. لكن The Omen يعتبر من الأفلام اللي بتقدم فكرة الطفل القاتل أو الطفل الممسوس بشكل رائع جدًا ومميز. ننصحكم بمشاهدة الفيلم لو عندكم أخ صغير شاكين في تصرفاته 🙂

Cape Fear

بعيدًا عن الأشباح والأرواح.. فيلم رعب عن مجرم قاتل بيستهدف أسرة المحامي اللي كان بيترافع عنه. المشكلة في الفيلم ده انه منطقي جدًا وبيقدم مستويات مختلفة من الرعب كلها هاتخلي ضربات قلبكم تتزايد مع كل مشهد!