كل اللي محتاجين تعرفوه عن أفلام عيد الفطر 2023
أفلام العيد أفلام عيد الفطر العيد 2023 سينمات القاهرة عيد الفطر
Cairo 360
هو عيد الفطر إيه غير كحك وعيدية وخروجة حلوة وأفلام سينما ماتتنسيش، ولإننا خلاص بنودع الشهر الأعز على قلوبنا، وعلى بوابة العيد وبهجته، جمعنا لكم الأفلام اللي هتتعرض بشكل رسمي خلال أيام العيد في السينمات، وهما 7 أفلام، بتتنوع أبطالها وحكاياتها.
“هارلي.. أسطورة الأسفلت”
مهندس ميكانيكا، رجع مع عيلته من الخليج، علشان يكمل دراسته في مصر، وبطريقة ما بيشتغل مع عصابة، وبيتحول لزعيمها، بطولة محمد رمضان، مي عمر، محمود حميدة، أحمد داش، مي كساب، حسني شتا، تأليف محمد سامي ومحمد سمير مبروك، إخراج محمد سمير.
“ابن الحاج أحمد”
لأول مرة بيخوض شيكو تجربة البطولة المطلقة، من خلال فيلم “ابن الحاج أحمد”، بيشتغل أحمد في محل بقالة في حارة شعبية، بيدخل في مشاكل كتير، علشان فاكر نفسه الوحيد في الحارة اللي فاهم كل حاجة عكس الحقيقة.
بيشاركه البطولة عدد من الفنانين منهم، سيد رجب، رحمة أحمد، صبرى فواز، محمد لطفي، مصطفى غريب، ضيف شرف بيومي فؤاد، فكرة عمرو سلامة، سيناريو وحوار محمد المحمدي وأحمد محيي، فادى أبوالسعود، إخراج معتز التوني.
“ساعة إجابة”
قصة الفيلم بتدور حول طفل، بتقوده الظروف لعوالم غريبة، وبيلاقي نفسه متورط كل مرة مع أسرة مختلفة في مواقف مثيرة، الأمر اللي بيعرض حياته للخطر أحيانًا.
بطولة الطفل سليم مصطفى، سوسن بدر، غادة عادل، شريف سلامة، آيتن عامر، نجلاء بدر، انتصار، محمد ثروت، بدرية طلبة، عمر كمال المطرب، فكرة أحمد شيكو، تأليف شيرين علاء، محمد خضر، أحمد شيكو، ريم معاليفي، مصطفى خضر ورحاب نبيل، إخراج مصطفى أبوسيف.
“يوم 13”
في جو مليان بالرعب، بيعيش عز الدين بعد رجوعه من الخارج، في قصر عيلته، ومع الوقت بيكتشف إنه مليان بالأشباح، بيحاول ميصدقش اللي بيشوفه، ياترى هيقدر؟ بطولة أحمد داوود، دينا الشربيني، شريف منير، جيهان خليل، جومانا مراد، أحمد زاهر، أروى جودة، إخراج وتأليف وائل عبدالله، يعتبر أول فيلم رعب مصري يعرض بتقنية 3D.
“مغامرات كوكو”
بيناقش قضية الرفق بالحيوان، من منظور جديد بين الحيوانات داخل أحد مستشفيات الطب البيطري، بطولة خالد الصاوي، بيومي فؤاد، شيرين رضا، إيهاب فهمي، منة فضالي، سيناريو وحوار إيهاب ناصر، ومن إخراج إسماعيل فاروق.
“رمسيس باريس”
شلة أصدقاء مصريين، بيقرروا يسافروا من رمسيس لباريس، وهناك بيشكلوا عصابة وبيتنكروا علشان يسرقوا لوحة الموناليزا، وسط مواقف ومفاجآت كوميدية، بيشارك في بطولة الفيلم عدد كبير من الفنانين وهم، هيفاء وهبي، محمد سلام، محمد ثروت، حمدي المرغني، محمود حافظ، مصطفي خاطر، أوس أوس، جومانا مراد، سامى مغاوري، تأليف كريم حسن بشير، إخراج أحمد خالد موسي.
“بعد الشر”
علي ربيع بيجسد شخصية “سولي”، بيحاول يهرب من زوجته، فبيلاقي نفسه متورط في علاقة عاطفية مع واحدة تانية، لكن مابيعرفش يتجوزها بسبب تعويذة سحرية، وعلشان يحل لغز التعويذة، بيستعين بصديقه “مشمش”، وبيدخلوا في سلسلة مواقف كوميدية.
بطولة على ربيع، ميرنا نور الدين، أوس أوس، رنا رئيس، بيومي فؤاد، عمرو عبدالجليل، سليمان عيد، هالة فاخر، شيرين تأليف أمين جمال ووليد أبوالمجد، إخراج أحمد عبدالوهاب.
عيد فطر سعيد يا مصريين!
