The Definitive Guide to Living in the Capital , Cairo , Egypt

مع تطور الأوضاع السياسية على مستوى العالم، كان لازم أفلام الجاسوسية وأجهزة المخابرات تاخد نقلة أبعد من مجرد محاربة الشيوعين اللي بتصفهم بالأوغاد، وتستبدل بيهم عدو جديد هو جماعات التطرف الديني، وفيلم Unlocked من أكبر الأمثلة على التطور ده.

القصة

الفيلم بيحكي عن عميلة المخابرات البريطانية أليس راسين، اللي بتقوم بدورها السويدية نومي راباس واللي بتعتزل العمل الاستخباراتي بعد فشلها في كشف حادث إرهابي كبير في لندن، لكن مهمة جديدة بيتم إسنادها لها، فقط علشان تكتشف أنها كانت ضحية خدعة كبيرة وأن المطلوب منها مش بس أنها تظل على قيد الحياة، لكن أيضًا أنها تكشف أبعاد مؤامرة بتستهدف تنفيذ هجوم بالأسلحة البيولوجية على بريطانيا.

فريق العمل

الفيلم من إخراج مايكل أبتد وتأليف بيتر أوبريان وبطولة نومي راباس وأورلاندو بلوم وتوني كوليت ومايكل دوجلاس وجون مالكوفيتش.

الأداء التمثيلي

كان واضح أن كل العبء التمثيلي في الفيلم وقع على نومي راباس، والحقيقة أنها قدرت تقوم بدورها على أكمل وجه، وكان واضح التمارين الرياضية اللي قامت بيها علشان تكون في الفورمة المناسبة علشان تقدر تنفذ مشاهد الأكشن خلال الأحداث. ونقدر تقول أنها نجحت في دورها.

إشادة كمان لازم نقولها بخصوص مايكل دوجلاس اللي قام بدور متميز رغم صغر مساحة الدور الخاص به، لكنه قام به بشكل رائع وفكرنا بنفسه وأفلامه العظيمة.

السيناريو والحوار والإخراج

سيناريو الفيلم أقحمنا في الأحداث بأسلوب الخداع. بمعني أنه بيسيبنا مع الأحداث لحد ما نكتشف وحدنا إنه تم خداعنا زي ما تم خداع بطلة الفيلم بالظبط، والأسلوب ده مفيد جدًا علشان المشاهدين يشعروا بالاندماج في الأحداث وإنهم بالفعل جزء منها.

لكن من ناحيه تانية بنعيب على الفيلم أن الحبكة الخاصة به كانت معروفة بالنسبة لنا وكنا قادرين نستنتج أكتر من 90 % من الأحداث واستنتاجنا كان في محله، وكنا محتاجين الحبكة تكون أكثر إثارة.

الديكورات والموسيقى والأزياء

ديكورات الفيلم كانت ضعيفة وكنا محتاجين تكون أقوى من اللي شوفناه في النهاية، خاصة أن المشاهد الداخلية احتلت جزء لا يستهان به من الأحداث. كمان الموسيقى التصويرية كان المفروض تكون أقوى وتسيب علامة معانا لكن للأسف الفيلم كان مستهين تمامًا بالديكورات والموسيقى التصويرية.

الخلاصة

فيلم Unlocked فيلم قوي ومميز وننصح بمشاهدته لمحبي أفلام الجاسوسية والمؤامرات.

علشان تبقى عارف:

نومي راباس بطلة الفيلم شاركت قبل كده في فيلم Alien: Covenant.