The Definitive Guide to Living in the Capital , Cairo , Egypt

سنة 2007 كانت واحدة من أحلى السنوات على محبي جهاز الألعاب الأسطوري (بلاي ستيشن). لما صدرت للمرة الأولى لعبة Uncharted اللي تعتبر واحدة من أحلى وأمتع ألعاب بلاي ستيشن حتى لحظة كتابة هذه السطور.

لما بتلعب لعبة، بتعيش الشخصية اللي بتقوم بيها. بتقضي معاها عشرات الساعات، ولو عدت اللعبة تاني هتلاقي نفسك بتقضي مع بطل لعبتك أيام وأيام. المتعة كانت مضاعفة مع شخصية ناثان دريك بكل تعقيداتها وتشابك دوافعها. علشان كده مستحيل يصمد فيلم زي Uncharted اللي مدته حوالي ساعتين، أمام لعبة من أجزاء كتير، متعمقة جوه محبيها بقالها أكتر من 15 سنة.

فيلم Uncharted بيحكي عن ناثان دريك (قام بالدور توم هولاند) الشاب اللي عاش طفولة صعبة، وبيختفي أخوه في ظروف غامضة، فبيضطر يتحد مع محتال مُجرم هو فيكتور سوليفان (قام بالدور مارك ويلبرج) علشان يوصلوا لكنز دفين، ويحاولوا يوصلوا لأخو ناثان كمان.

الطريقة الوحيدة علشان تستمتعوا بفيلم Uncharted هي أنكم تنسوا العلاقة بينه وبين اللعبة المشهورة. وتحاولوا تتفرجوا عليه كعمل منفصل. في الحالة دي هتلاقوا فيلم مُسلي، وفيه مطاردات وأكشن مميزين، مع مؤثرات خاصة ومشاهد مطاردات بين طيارات وسفن وسيارات. مع قصة خفيفة مافيهاش عُقد أو الغاز. وده يخليه فيلم رائع للـ movie nights في الويك اند لكل أفراد العيلة. خاصة لو فيها شباب أو مراهقين.

تسكين الشخصيات في الفيلم كان نمطي جدًا. توم هولاند في نفس شخصية سبايدر مان اللي اشتهر بتقديمها. بنفس الخلط بين الكوميديا والبراءة مع إمكانيات جسدية ممتازة بتخليه يعمل مشاهد أكشن كويسة.

مارك ويلبرج هو كمان بيعمل الدور النمطي اللي بيعمله في معظم أعماله اللي فاتت.. والحقيقة أن رأينا في ويلبرج أنه فنان عنده موهبة عظيمة، لكنه مضيعها في الاستسهال في اختيار أدواره وأن أعماله الأخيرة معظمها نسخة من بعضها.

مفاجأة الفيلم، هي الدور الصغير والغير مؤثر اللي قام بيه أنطونيو بانديراس. والحقيقة أننا مش فاهمين ليه بيقبل على نفسه يعمل أدوار صغيرة وهامشية. على الرغم أن سنه وجاذبيته وقدراته التمثيلية أحسن من كده بكتير. خايفين على بطل Desperado أنه ياخد نفس السكة اللي أخدها نجوم زي فان دام أو نيكولاس كيدج.

على الرغم أن المقارنة بين اللعبة والفيلم ظالمة لحساب الفيلم، لكن صناع Uncharted مصممين طول الوقت على الربط بين اللعبة والفيلم. خاصة لما تحولت الموسيقى التصويرية للموسيقى الخاصة باللعبة. وتسكين شخصيات من عالم اللعبة طول الوقت في الأحداث.

خلاصة كلامنا عن Uncharted.. كان يفيد صناع الفيلم لو فصلوا بين الفيلم واللعبة. الربط المستمر بين العملين -في رأينا- مش هيكون لصالح الفيلم. زي قراء الروايات لما بيتفرجوا على القصة لما تتحول لفيلم. عدد كبير منهم مش بتعجبهم.