لو هتستخدموا مترو الأنفاق.. نصائح طبية للحماية من “كورونا”
الحماية من كورونا الوقاية من كورونا صحة كورونا مترو الأنفاق مواصلات القاهرة نصائح طبية وقاية
Mohamed Talaat
مترو الأنفاق من وسائل المواصلات العامة اللي عليها إقبال شديد في القاهرة، وبحسب إحصائيات رسمية بيستخدم المترو يوميًا أكتر من 3 مليون شخص، وفي ظل أزمة “كورونا” اللي بيعاني منها العالم كله حاليًا، قررنا نتكلم مع الدكتور أحمد عبد الحليم، الطبيب بمستشفى الشيخ زايد التخصصي، علشان نعرف منه أهم النصائح الطبية اللي لازم ناخد بالنا منها وإحنا في المترو.
أولًا الدكتور أحمد عبد الحليم، بينصح كل الناس بمحاولة تجنب استخدام المترو بشكل خاص والمواصلات العامة بشكل عام، واستخدام وسائل مواصلات تانية أقل ازدحامًا زي التاكسي أو خدمات النقل الذكي، لكن لو مافيش إمكانية لعمل ده، يبقى لازم تختاروا عربية في المترو مايكونش فيها تكدس وزحمة كبيرة، حتى لو هتنتظروا أكتر من قطار، خصوصًا إن زمن التقاطر غالبًا مش بيزيد عن 4 دقائق.
لما تركبوا المترو، فالنصيحة الأهم هي أنكم تتجنبوا لمس أي شخص أو شيء داخل المترو بشكل نهائي، وبيشرح الدكتور أحمد إنه ممنوع لمس أي جزء في المترو، سواء باب أو مقابض أو وسائل الحماية من الوقوع، وحتى الشبابيك، ولو ده حصل فممنوع تقربوا إيديكم من ناحية الفم أو الأنف بعدها، لحد ما تعقموها بكحول نسبته 70% أو سنتايزر، أو لحد ما تغسلوها بالمياه والصابون، وكمان تجنبوا تمامًا الوقوف وشكم في وش أي شخص مهما كان مين، يعني حتى لو كان يبدو عليه إنه شخص سليم.
ومن ضمن النصائح اللي بيؤكد عليها الدكتور أحمد عبد الحليم، هي أنكم تلبسوا ماسك N95 اللي بيحمي بشكل أفضل من الإصابة بفيروس “كورونا”، ولو مش متاح مافيش مشكلة إنكم تستخدموا ماسك أو كمامة جراحية أو عادية، وكلها هتؤدي الغرض المطلوب منها، ويكون لبسها مغطي للأنف والفم بشكل كامل.
وكمان لو لاحظتم وجود أي شخص عليه أعراض أنفلوانزا، فممنوع تقربوا منه تمامًا، ويفضل تبعدوا عنه بمسافة 2 متر على الأقل، ولو أنتم مصابين بأي أعراض برد، بلاش تركبوا أي مواصلة عامة حفاظًا على سلامتكم وسلامة الآخرين.
وفي النهاية بنتمنى لكم ألف سلامة يا أهل القاهرة.
