The Definitive Guide to Living in the Capital , Cairo , Egypt

فيلم The Good Liar يعتبر واحد من الأفلام اللي بتحاول تلعب على أكثر من تيمة في نفس الوقت، وعلى الرغم من المخاطر اللي بتواجهها النوعية دي من الأفلام، واللي أولها الفشل في إنها تقدم أحداث مترابطة، لكن The Good Liar قدر يخرج من كل ده بأقل خسائر ممكنة.

فيلم The Good Liar بيحكي عن النصاب المحترف “روي كورتناي” واللي قام بدوره “إيان ماكلين” واللي بيحاول يوقع أرملة ثرية في حباله علشان ينصب عليها، وقدمت دورها “هيلين ميرين” لكن كل خططه بتتغير مع تتابع الأحداث.

لو اتسألنا على أكتر حاجتين مميزتين في الفيلم هانقولكم وبكل بساطة وضمير مرتاح السيناريو وبعدين الأداء التمثيلي، والحقيقة إن العنصرين دول عملوا “دويتو” مهم ساعد على نجاح الفيلم، لإن السيناريو كان سريع، وقدر يقدم مشاهد جيدة وقصة بدون حشو أو مط، وفي نفس الوقت الأداء التمثيلي كان أكثر من رائع، وواضح فيه التمكن والخبرة.

على الرغم من تقدم “هيلين ميرين” و”إيان ماكلين” في السن، إلا إن كل واحد فيهم قدر يقوم بالدور بشكل أكثر من رائع، مع التركيز على ملامح الوجه ونظرات العيون لتقديم أفضل أداء تمثيلي ممكن منهم، وهنا ييجي دور المخرج “بيل كوندون” علشان يوظف القدرات التمثيلية دي بشكل جيد، ويخدم القصة والأحداث، وطبعًا ما ننساش إنه هو مخرج أفلام زي Mr. Holmes و جزئين من أجزاء سلسلة أفلام The Twilight، يعني تاريخه يشهد له.

العيب الأساسي في الفيلم كان إن القصة سهلة التوقع إلى حدٍ ما، خاصةً لو كان ليكم خبرة طويلة في السينما والأفلام، لكن ممكن ببساطة تعوضوا ده بعناصر قوة الفيلم اللي اتكلمنا عليها، بالضبط كإننا مسافرين طريق طويل احنا عارفينه لكن بمواصلة مريحة تخلينا ما نحسش بالملل.