The Definitive Guide to Living in the Capital , Cairo , Egypt

لما بيتقدم فيلم وينجح، أحيانًا بيسعى صناعه لاستغلال النجاح من خلال تقديم جزء ثاني، لكن المهمة بتكون أصعب لو استمر نجاح الفيلم وقرر فريق العمل تقديم جزء ثالث منه. التحديات بتكون أكبر وتوقعات المشاهدين بتكون أعلى. يا ترى إيه اللي حصل مع The Equalizer 3؟

فيلم The Equalizer 3 بيستمر في رحلة العميل السري المتقاعد روبرت ماكول، اللي شوفناه في الأجزاء السابقة بيحاول يجد السلام والحياة المريحة له بعد استقالته من عمله اللي خلاه إنسان استثنائي، لكن في كل مره بيقابله مشكلة جديدة بتهدد سلامه، بالتالي بيضطر يتعامل معاها.

في The Equalizer 3 بنشوف نفس القصة. روبرت عايش حياة هادئة في جنوب إيطاليا، وسط ناس لطفاء ومجتمع مسالم. لكن العصابات المسيطرة على المنطقة هناك مش عاوزة تسيب الناس المسالمة في حالها، وبتبدأ سلسلة من المواجهات، اللي بتخلي روبرت يكتشف انه مش في مواجهة مع العصابات دي بس. لكن مع الجهة اللي واقفة وراهم. بالتالي الموضوع أكبر من مجرد حرب بين شخص يملك مهارات قتالية نادرة وبين مجموعة عصابات.

مستوى الأكشن في The Equalizer 3 ممتاز وعلى نفس نهج الأجزاء السابقة، لكن ظهور دينزل واشنطن نفسه في الفيلم كان قليل نسبيًا مقارنة بالأجزاء السابقة. والمرة دي السيناريو سمح بفرد مساحة أكبر لتدخل قوات الشرطة أو الـCIA أكتر من مرات تدخل واشنطن في الأحداث. والحقيقة إحنا مش عارفين هل ده بسبب انشغال دينزل بتصوير أعمال ثانية مثلًا؟ ولا السيناريو كان بيمهد لمرحلة جديدة للسلسلة ممكن بطلها مايكونش دينزل واشنطن بالأساس؟!

عجبنا قوي التصوير في جنوب إيطاليا والروح الحلوة بين الناس اللي تم ظهورها في الفيلم، وعجبنا كمان حرص الفيلم على الاحتفاظ بتيمات الحظ الصغيرة في السيناريو، على مدار الثلاث أجزاء. خاصة في مشهد القتال النهائي اللي لازم يكون فيه أمطار أو إعصار، على مدار الأجزاء الثلاثة.

مش محتاج تشوف الأجزاء السابقة علشان تفهم الجزء الحالي، وإن كنا ننصح محبي الأفلام بعمل Movie night تجمع الثلاث أجزاء وراء بعض Back2Back للمزيد من المتعة وربط الأحداث ببعضها.