The Definitive Guide to Living in the Capital , Cairo , Egypt

أفلام كتير تناولت فترة الحرب الأمريكية في العراق، لكن أفلام قليلة اللي بتخوض داخل منطقة الصراع النفسي داخل الجندي ما بين ضرورة الالتزام بالواجب المطلوب منه، وفي نفس الوقت شعوره أنه في الأخر مُحتل وأن الأرض دي مش بتاعته.

القصة

فيلم Thank You for Your Service بيحكي عن مقاتل أمريكي بينضم لصفوف الجيش وبيسافر للخدمة في العراق. وهنا بيتعرض لعدد كبير من الأهوال والمصائب المصاحبة للحرب. وبعد عودته لبلاده من جديد بيشعر أن الحرب لسه بتطارده. وأن اللي شافه وعمله في العراق بيطارده حتى في الولايات المتحدة. هل هيقدر يتعايش مع كل المشاكل دي؟

فريق العمل

الفيلم من تأليف وإخراج جايسون دين هول ومقتبس عن كتاب ديفيد فينكل. أما البطولة كانت من نصيب هالي بينيت ومايلز تيلر وإيمي شومر وكيت لين شيل وجو كولي وكيشا كاستل-هيوز.

الأداء التمثيلي

كان لازم تهتم جدًا ونركز في الأداء التمثيلي في فيلم Thank You for Your Service علشان طبيعة التجربة والانفعالات في الفيلم ده قائمة على تمثيل أبطاله، وعلى قدرتهم على أنهم يعكسوا لنا طبيعة المشاكل النفسية اللي بيعانوا منها.

والحقيقة أن كل أبطال الفيلم قدروا يعكسوا لنا طبيعة الصراع اللي بيدور جواهم. والانعكاس ده كان بالطريقة الصعبة: نظرات العيون وطبقة الصوت، وغيرها من أدوات الممثل اللي عرفنا يستعملوها بشكل صحيح تمامصا علشان يوصلوا لنا شعورهم وانفعالاتهم المختلفة.

السيناريو والحوار والإخراج

سيناريو الفيلم كان جيد وقوي، لكن للأسف حسينا بالملل خاصة في الجزء الثاني من الأحداث، ولو قدر الإخراج أنه يسيطر على خط سير السيناريو بشكل أفضل من اللي شوفناه في النهاية كان هيكون أفضل. لكن من الواضح أن المخرج كان مهتم بأداء الأبطال وفاته أنه يظبط سرعة سير السيناريو وخط سيره.

الديكورات والموسيقى والأزياء

ديكورات الفيلم كانت أكثر من رائعة، خاصة أن الفيلم بيصور مجموعة من المعارك في العراق ثم مشاهد تانية في أمريكا، بالتالي كان فيه تنوع كبير في الديكورات وأماكن التصوير. الموسيقى التصويرية كمان على الرغم أنها لم تكن جديدة علينا لكن مستواها كان متميز ونقلتنا لمساحة الأحداث اللي بيناقشها الفيلم.

الخلاصة

فيلم Thank You for Your Service فيلم حربي نفسي متميز ويستحق المشاهدة بتركيز.

علشان تبقى عارف:

الفيلم يعتبر أول تجربة إخراجية لـ جايسون دين هول.