The Definitive Guide to Living in the Capital , Cairo , Egypt

لازم نعترف لكم إننا مش من الناس اللي تابعت سلسلة حرب النجوم من بدايتها لحد النهارده، علشان كده هنتكلم عن الفيلم ده تحديدًا، لكن ده لا يمنع اعترافنا بإنها واحدة من أهم وأكبر سلاسل الأفلام وأكثرها تأثيرًا، مش بس على قطاع واسع من المشاهدين لكن على صناع السينما كمان، لكن السؤال المهم هو: هل Star Wars: The Rise Of Skywalker يعتبر أحسن ختام للسلسلة دي؟

فيلم Star Wars: The Rise Of Skywalker بيقدم قصة تقليدية عن الحرب بين “المقاومة” من جهة وبين “النظام الأول” من جهة ثانية، لكن المواجهة المرة دي بتكون حاسمة ونهائية، وفي نفس الوقت كل الأطراف بتحاول تواجه ماضيها وتتصالح معاه.

المخرج “جي. جي. أبرامز” دخل في مهمة إخراج جزء أخير من سلسلة عملاقة مكونة من 9 أفلام، بيحاول يقفل فيه كل خطوط السلسلة، وفي رأينا إنه كان غلط منه إنه يحاول يرضي كل الأطراف، لإن في النهاية مستحيل يوصل لسيناريو يعجب ملايين المشاهدين حول العالم، خاصةً إن قطاع كبير منهم متابعين دائمين للسلسلة.

مبدئيًا لازم تكونوا شوفتوا باقي الأجزاء السابقة علشان تفهموا وتتابعوا وتستمتعوا بالجزء الأخير، خاصةً إنه الفيلم بيقدم سلسلة من مشاهد النوستالجيا اللي بتداعب شعور متابعي السلسلة القدام وبتقدم لهم تمهيد للنهاية.

ماعجبناش في الفيلم الاستعجال غير العادي في الأحداث، حتى إننا بنشوف أحداث مهمة جدًا بتحصل خلال ثواني تقريبًا على الشاشة، وده خلق انطباع إن فيه حشو كتير للأحداث علشان نشوف كل حاجة في حوالي ساعتين ونصف بس.

محبي مشاهد الصراع بسيوف الليزر والخدع السينمائية هيشوفوا كتير منها مع أداء قوي من كل أبطال الفيلم تقريبًا، وعجبنا في الأداء إن كل فنان كان عارف كويس تاريخ الشخصية اللي بيأديها في السلسلة، وبيقدم لنا الأداء من خلال وعيه الكامل بتطور الشخصية على مدار السنين.