The Definitive Guide to Living in the Capital , Cairo , Egypt

لما نتكلم عن حياة المشاهير، كل اللي بيخطر على بالنا، هي الفلوس بدون حساب، السفر لكل مكان بدون تعب، حفلات وسهر ودلع على أعلى مستوى. لكننا بننسى نشوف الجانب المظلم لحياة الشهرة، والضريبة اللي بيدفعها المشاهير من سلامهم النفسي، وصحتهم الجسدية والعقلية.

فيلم Selena Gomez: My Mind & Me اللي بيُعرض حصريًا على شبكة Apple TV+ الشهيرة، بيستعرض الحياة الخفية على قطاع كبير من الناس، عن حياة المطربة والممثلة سلينا جوميز.

الفيلم بيغوص وراء سيلينا، وإيه اللي بيحصل وراء كواليس حفلاتها وأعمالها، وإزاي بتحس طوال الوقت أنها لوحدها غير كافية، وأن ثقتها بنفسها بتكون دائما مهتزة. وشعورها المستمر أن أدائها الفني مش كويس وأنها هترجع تاني لفقاعة (ديزني) اللي بدأت معاهم رحلتها الفنية، واللي بتضع كل الفنانين اللي يشتغلوا معاها في قوالب ثابتة.

الفيلم بيستعرض الفترات الصعبة في حياة سيلينا، زي تشخيصها بمرض الذئبة، وخضوعها لعملية زراعة كلية، وبنشوف إزاي أنها لما بتحاول تتجاوز كل آلامها الجسدية بترجع من جديد لمسقط رأسها، علشان تتعرف من جديد على جيرانها بتوع زمان، وترجع تستعيد معاهم ذكرياتها عن حياتها لما كانت طفلة.

المميز في Selena Gomez: My Mind & Me أنه بيستعرض مجموعة كبيرة من الصور والفيديوهات لطفولة سيلينا، بالإضافة لصور ومقاطع من كواليس الحفلات. بنقرب فيها للوجه الحقيقي لسلينا بعيدًا عن مكياج المحترفين وعدسات الكاميرات المحترفة اللي بتداري الألم والشعور باليأس والأحباط.

الجزء المهم في Selena Gomez: My Mind & Me هو اللي بيتم تشخيص سلينا فيه بالاضطراب ثنائي القطب. وبنشوف رحلتها في فهم نفسها بشكل أفضل، وفهم أن كل الاضطرابات اللي كانت بتعاني منها الفترة المصاحبة لانفصالها عن حبيبها المطرب (جاستن بيبر) كانت نتيجة مرض نفسي لازم تتعلم إزاي تتأقلم معاه.

أهم ما قدمه Selena Gomez: My Mind & Me على الإطلاق هو الجزء اللي بيناشد فيه صناع الفيلم أي شخص يشعر بالاكتئاب أو بالميول الانتحارية. أنه يتصل بالمتخصصين. ووضعت شركة آبل رابط لمجموعات متخصصة في الدعم والمساندة حول العالم، وبدون مقابل.

لو مش بتحبوا قصص كواليس حياة المشاهير، فيلم Selena Gomez: My Mind & Me مش هيكون أحسن فيلم تشوفوه. لكن لو مهتمين بتأثير حالتنا النفسية على شغلنا وحياتنا والطريقة اللي بنشوف بيها نفسنا والأخرين. ننصحكم بمشاهدة فيلم هيكون مميز بالنسبة لكم.