The Definitive Guide to Living in the Capital , Cairo , Egypt

 لما نسمع إن “ليام نيسون” بيقوم ببطولة فيلم، أول حاجة بتيجي في بالنا هي إننا هنتفرج على فيلم أكشن، لكن المفاجأة بالنسبة لنا كانت الفيلم التراجيدي Ordinary Love.

فيلم Ordinary Love بيحكي عن زوج وزوجة بيعيشوا قصة حب جميلة، وعشرة طويلة، دامت لسنين، وفجأة وبدون مقدمات بتكتشف الزوجة إنها مصابة بسرطان الثدي، ومن هنا بتبدأ القصة تاخد منحنى مختلف تمامًا سواء بالنسبة لها أو لقصة حبها وزواجها بشكل عام.

زي ما إحنا حاسين وعارفين وشوفنا، قصة الفيلم مؤلمة.. وفيها دموع كتير.. لكن المخرجين “جلين ليبيرن” و”ليزا باروس ديسا” قدروا يغلفوا الألم ده بصورة سينمائية جميلة وكادرات رائعة، وقصة حب رومانسية جميلة جدًا، لكن كل ده ما منعش دموعنا من النزول في بعض المشاهد.

الأداء التمثيلي لـ “ليام نيسون” كان رائع، وواضح أوي احترامه لسنه وقدراته التمثيلية اللي واضح فيها إنه عاوز يثبت لنا إنه قادر على تجسيد أي شخصية تُطلب منه وفي نفس الوقت تناسب سنه، لكن التمثيل الأروع كان للرائعة “ليزلي مانفيل” في دور “جوان” واللي قدرت مش بس تنقل لنا المعاناة الجسدية لمريض السرطان، لكن المعاناة النفسية كمان.

الفيلم فعلًا يستحق المشاهدة في سينمات القاهرة.