The Definitive Guide to Living in the Capital , Cairo , Egypt

على الرغم من أن التصنيف الفعلي لفيلم Love Hard بيقول إنه فيلم كوميدي خفيف، لكن بالنسبة لنا الفيلم كان بيطرح سؤال فلسفي في منتهى الأهمية: هل أصبحنا بنحكم على أي حاجة بالظاهر بس وبنهمل الجوهر اللي ممكن يكون أحلى؟

فيلم Love Hard بيحكي عن ناتالي – قامت بالدور نينا دوبريف – اللي بتحاول ترتبط من خلال تطبيقات التعارف على الـ “سمارت فونز”. لكن في كل مره ناتالي بتواجه فيها مشكلة مختلفة مع الشخص اللي بتقابله من خلال التطبيقات دي.

المشاكل الأساسية اللي بتتعرض لها ناتالي، بتكون عدم الصدق، والغش والخداع، أو أن الشخص اللي بتتعرف عليه يكون مثالي بزيادة فبيرفض يكمل معاها، أو سيىء جدًا بحيث هي اللي ترفضه.

ناتالي حولت المواقف الوحشة اللي بتواجهها في التعارف على الإنترنت، لوظيفة، من خلال كتابة مقالات في موقع إلكتروني بتحكي فيها عن المواقف دي.

القصة بتتحول لشكل مختلف مع ناتالي، لما بتقابل أخيرًا الشخص المثالي بالنسبة لها. وبتقضي وقت طويل في الكلام معاه أونلاين… لحد ما بتيجي اللحظة اللي بيقول لها فيها أنه بيتمنى إنها تقضي معاه الكريسماس، رغم بُعد المسافة بينهم. هنا بتقرر أنها تسافر له المسافة الطويلة كلها علشان تعمل له مفاجأة. ثم بتكتشف أن الـ… مش عاوزين نحرق عليكم الأحداث أكتر من كده.

ناتالي كعادة أغلبنا في الزمن ده. اختارت أنها تحكم على الناس من ظاهرهم، ونسيت أن الجوهر هو اللي بيفضل مش الشكل أو نمط الحياة اللي بيكون مبهر من بره.

عجبنا في Love Hard الاهتمام الشديد بالتفاصيل.. لدرجة أننا في أول الفيلم بنشوف مناقشة عن الأفلام، ما بين أفضل فيلم لناتالي اللي هو Die Hard وأفضل فيلم للكريسماس من وجهة نظر حبيبها (قام بدوره جيمي أو يانج) والفيلم كان Love Actually بالتالي اسم فيلمنا هو مجموع الفيلمين.. Love Hard.. ودي تفصيلة جميلة جدًا.

عجبنا قوي العالم اللي ابتكره المؤلفين دانيال ماكي وريبيكا إوينج حوالين شخصية ناتالي.. على الرغم من أن الشخصيات دي نمطية جدًا؛ المدير حاد الطباع.. صاحبة البطلة اللي جسمها مليان واللي بتحرك الكوميديا في الأحداث.. وحتى عيلة حبيبها بكل تفاصيلها.

لكن السؤال: ليه عجبتنا كل الشخصيات دي رغم نمطيتها؟ السر هنا في أن Love Hard عارف (زبونه) كويس جدًا جدًا.. الفيلم بيستهدف الشباب والمراهقين اللي عارفين كويس أسرار مواقع وتطبيقات الـ Dating وكتير منهم استخدموا الخدمات دي بالفعل.

كمان الفيلم بيتكلم عن فترة احتفالات الكريسماس بالتزامن مع فترة الكريسماس، وده بيدينا متعة إضافية في المشاهدة، كل ده بدون ما يتنازل  الفيلم عن أنه يوصل رساله مهمة، هي ضرورة أننا نهتم تاني بالجوهر على حساب المظهر. بدون التنازل عن جرعة كويسة من الكوميديا والرومانسية طبعًا.

Love Hard فيلم متوازن بتعرض على نتفليكس.. مناسب للمشاهدة بين المخطوبين أو المتجوزين حديثًا، والناس اللي اتعودت تحكم على بعضها بالشكل بس. ومش بتهتم تاخد خطوة أعمق وتعرف الناس بشكل حقيقي بعيد عن المظاهر الخارجية.