The Definitive Guide to Living in the Capital , Cairo , Egypt

إمتى ممكن تبدأ رحلتك لتغيير حياتك كلها للأفضل؟ ممكن يكون أفضل وقت هو لما توصل للحضيض تمامًا؟! هو ده اللي اكتشفته فلورا، في رحلتها لإعادة اكتشاف نفسها في أحداث فيلم Flora and Son.

فيلم Flora and Son بيحكي عن فلورا (قامت بالدور إيف هيوسون) اللي بتربي ابنها الوحيد ماكس، بعد زواج فاشل انتهى بطلاق حتمي.

فلورا بتعيش في الحضيض فعليًا. حضيض من الناحية المادية، لأنها مش عارفة تدير حياتها المالية بشكل كويس، وحضيض عاطفي لإنها مش عارفة تدير حياتها النفسية بشكل كويس، وحضيض إنساني لإنها مش عارفه تدير علاقتها بإبنها بشكل كويس. بمعنى أصح، ممكن نقول أن فلورا هي التجسيد الفعلي للفشل في أي وكل شيء في الحياة. لحد ما يغير حياتها جيتار!

أيوا الكلمة اللي فاتت قريتوها صح. فلورا بيدخل حياتها (جيتار) بتحصل عليه بطريقة ما مش عاوزين نحرقها عليكم. وبتلاقي نفسها عاوزه تتعلم تعزف على الجيتار، ومن هنا بتبدأ في الحصول على درس أونلاين في العزف، ومن هنا بتتغير حياتها هي وابنها تمامًا لما بيكتشفوا قدرتهم على صناعة أغاني حقيقية وملهمة للجمهور.

شركة آبل اللي تعتبر الجهة المنتجة للفيلم المعروض على منصتها (آبل تي في بلاس)، مش قادرة تنسى أنها بالأساس شركة تكنولوجيا متخصصة في صناعة وتطوير الأجهزة الذكية على اختلاف أنواعها. بالتالي بنشوف رسائل خفية خلال معظم أحداث الفيلم بتورينا إزاي المكالمات بتحصل من خلال فيس تايم. وإزاي استخدام أجهزة آبل بيحصل طول الوقت من كل المستخدمين تقريبًا.

عجبنا جدًا تمثيل إيف هيوسون في دور البطولة، وإيف من الممثلات اللي لمع اسمهم من خلال اختياراتها القوية في الفترة الأخيرة، شوفناها في Bad Sisters وBehind her eyes وفي كل مرة كنا بنحس إننا أمام موهبة تستحق نركز معاها ونشوف أعمالها القادمة.

عجبنا قوي في جون كارني مخرج الفيلم تركيزه مع تفاصيل الحياة اليومية لأبطال الفيلم، واهتمامه بتقديم صورة حقيقية للناس والمجتمع، بعيدًا عن الصورة المثالية اللي بنشوفها في أفلام تانية، وده انعكس على أداء أبطال فيلمه وإزاي ظهروا هم كمان في أداء بسيط مباشر غير انفعالي وفي نفس الوقت صادق ويوصل للمشاهد على طول.

مانقدرش نقول إن الفيلم غنائي استعراضي بالأساس، لكن برضه مانقدرش ننكر أهمية استخدام الأغاني والموسيقى داخل Flora and Son. والحقيقة أن الفيلم متطعم فيه مجموعة من الأغاني والاستعراضات الجميلة جدًا واللي تم إخراجها بشكل ممتاز وبشكل منسجم تمامًا مع دراما الفيلم.

أحلى ما في Flora and Son أنه بيدينا جرعة أمل وحب للموهبة اللي جوه كل واحد فينا، وبيعرفنا أننا بس لو كان عندنا الإيمان الكافي بالموهبة دي هنقدر نغير حياتنا 180 درجة مهما كانت ظروفنا صعبة.