The Definitive Guide to Living in the Capital , Cairo , Egypt

في فيلم suicide squad شوفنا العلاقة المعقدة والغريبة بين “الجوكر” وبين “هارلي كوين” اللي قامت بدورها “مارجوت روبي” واللي ممكن نعتبرها أنثى الجوكر، واللي كانت متحدة معاه في علاقة حب، لكن في Birds of Prey بنشوف الجانب الحقيقي للعلاقة دي من خلال قصة “هارلي كوين” بشكل منفصل.

الفيلم بيبدأ بـ”هارلي كوين” بتحكي قصتها بنفسها، وبتعرفنا إن العلاقة بينها وبين الجوكر كانت علاقة “مسممة” وإنها قدرت تتخلص منها علشان تخلق أسطورتها الشخصية، أسطورة قائمة على الجنون والفوضى، وباقي العلامات المميزة لشخصية الجوكر على اختلاف الأفلام اللي تناولتها.

العلاقات المسممة تعتبر كلمة السر في الفيلم، بنشوف أكتر من علاقة خلال الفيلم أدت في النهاية بصاحبتها للإنضمام لعالم الجريمة، وطبعًا الفيلم فيه نزعة حقوق المرأة اللي أصبحت السمة السائدة في معظم إنتاجات هوليوود مؤخرًا.

بعيدًا عن الأداء التمثيلي لـ”مارجوت روبي” اللي قدرت تجسد شخصيتها المجنونة بشكل جيد، باقي الأداء التمثيلي لباقي الأبطال كان أقل بكتير من توقعاتنا، ومانفعتش معانا فكرة تصوير الفيلم وكرنفال الألوان المتفجرة في كل مكان وتقديم الفيلم كقصة كوميكس، كل ده ما قدرش يغطي على الأداء التمثيلي الباهت والضعيف، وبالتالي حسينا في النهاية إن المعادلة مش مظبوطة.