The Definitive Guide to Living in the Capital , Cairo , Egypt

في سبتمبر 1996 قُتل مطرب الراب المشهور توباك شاكور. عملية القتل وضعت كلمة النهاية على حياة صاخبة، وعلى فصول كتير رسمت ملامح حياة جامحة. وحتى لما ظن كتير من محبي توباك أن الموضوع انتهى، اتضح أن جريمة القتل كانت البداية لأحداث جديدة، كانت تستحق يتم تناولها في فيلم خاص بها.

ده اللي هنحكي عنه في عرضنا لفيلم All Eyez on Me في السطور الجاية.

القصة

الفيلم بيتناول أحداث حقيقية لحياة الفنان توباك شاكور، من ولادته في يونيو 1971 وتألقه في عالم الغناء ودخوله السجن، وحتى لحظة وفاته اللي بتعتبر لغز حتى اليوم. الفيلم كمان بيستعرض علاقة توباك بوالدته وبالمحيطين حواليه، وإزاي أتأثر وأثر فيهم بدوره.

فريق العمل

الفيلم من تأليف جيريمي هافت وستيفن باجاتوريان. ومن بطولة دميتريوس شيب جونيور وداناي جوريرا وكاترينا جراهام وآني إيلونزيه ودومينيك إل. سانتانا. وأخيرًا الفيلم من إخراج بيني بوم.

الأداء التمثيلي

من المشهد الأول للأحداث كان واضح المجهود اللي بذله دميتريوس شيب جونيور في تجسيد شخصية توباك شاكور. والحقيقة أن جونيور قدر يتقمص شخصية توباك بشكل مميز. لكن للأسف باقي عناصر الفيلم لم تساعده علشان يقدم في الأخر عمل جيد أو مميز.

السيناريو والحوار والإخراج

بنعيب على سيناريو الفيلم أنه ترك كل الأحداث المثيرة والكويسة في الفيلم للنصف الثاني من الأحداث. لكن النصف الأول من الأحداث كان طويل وممل وفشل في جذب انتباهنا، رغم محاولتنا التركيز في الأحداث.

لكن الجيد في السيناريو كان تركيزه على علاقة توباك بوالدته واهتمامه بيها، وتركيز السيناريو على القصص وراء الأغاني اللي قام توباك بأدائها.

الحوار في الفيلم لم يكن بنفس قوة السيناريو. أما الإخراج فتميز بأنه قادم من عالم الفيديو كليب وإخراج الأغاني. علشان كده قدر بيني بوم يخرج الأغاني والفيلم بشكل عام بشكل جيد.

الديكورات والموسيقى والأزياء

بما أننا بنتكلم عن فيلم عن شخصية غنائية موسيقية، فالفيلم كان متميز على صعيد الموسيقى التصويرية والأغاني. كمان الديكورات لعبت دور مهم علشان نشعر بالأحداث واللي بتدور في التسعينات. لكن للأسف مهما كانت الموسيقى والديكور كويسة مش هنقدر نستغنى بيهم عن ضعف السيناريو والحوار والإخراج.

الخلاصة

فيلم All Eyez on Me لولا أنه مسنود على الأحداث الحقيقة لحياة ووفاة توباك شاكور، كان هيبقى فيلم ممل وضعيف. لكن التوليفة النهائية للفيلم كانت مقبولة. على الأقل بالنسبة لمحبي توباك.

علشان تبقى عارف:

تقييم الفيلم على موقع IMDB 5.8 من 10، ويعتبر تقييم منخفض خاصة أن عدد المشاركين فيه حوالي 11 ألف مستخدم للموقع.