The Definitive Guide to Living in the Capital , Cairo , Egypt

منطقة وسط البلد في القاهرة واحدة من أكثر المناطق الغنية بالقصص، وتناولتها كتير من الروايات وقصص الأفلام والمسلسلات، ولسه لحد النهارده بنشوف قصص رائعة عن المنطقة دي.

في الإطار ده بتدور أحداث “صندوق الدنيا” اللي بيحكي عن مجموعة من الأشخاص بتتقاطع بيهم المصائر في منطقة وسط البلد، ونقدر نعتبر الفيلم مكون من مجموعة قصص قصيرة منفصلة.

بطلة الفيلم “رانيا يوسف” بتقوم بدور بنت من أسرة بسيطة بتحاول تحقق حلمها الطبيعي بالزواج وإن يكون عندها طفل، لكن واضح إن تحقيق حلم زي ده بيكون صعب في الظروف الصعبة اللي بيعاني منها معظم الناس.

بنشوف “باسم سمرة” و”خالد الصاوي” بيقوموا بأدوار قوية ومؤثرة، ولأول مرة من فترة طويلة نحس إن باسم رجع تاني للـ “فورمة” وبدأ يقدم أعمال جيدة، كمان “خالد الصاوي” خرج من مود “الفيل الأزرق” وبدأ يقدم نوعية شخصيات جديدة ومختلفة، والفنان المُقل جدًا في أعماله “أحمد كمال” كمان بنشوفه بشخصية أكثر من رائعة زي ما عودنا في معظم الأعمال اللي بيختارها.

لكن كعادة الأفلام اللي بتتكون من قصص كتير، الفيلم بيحاول يناقش أكتر من قضية في المجتمع وده ممكن يحسس المشاهد بالتشتت، وإن المخرج والمؤلف “عماد البهات” عاوز يناقش كل حاجة في ساعة ونصف بس.

من الحاجات اللي عجبتنا في أسلوب “عماد البهات” في الإخراج، هو تصويره للحياة على هيئة مسرح، واستخدام شخصية “البلياتشو” كأدة وشخصية رئيسية فيها، وهو برده نفس اسم آخر فيلم قدمه عماد كمخرج من حوالي ١٣ سنة.