The Definitive Guide to Living in the Capital , Cairo , Egypt

المثل الشعبي المصري القديم بيقول “بصلة المحب خروف”.. يعني لو بتاكل بصلة مع حبيبك. هيبقى طعمها بين شفايفك زي ما تكون بتاكل خروف.. هو ده ملخص فيلم الهوى سلطان.. تعالوا نعرف التفاصيل.

الهوى سلطان بيحكي عن سارة وعلي (منة شلبي وأحمد داوود) اللي عايشين مع بعض قصة صداقة غريبة شوية.. صداقة من الطفولة لحد سن الشباب. بيشاركوا تفاصيل يومهم مع بعض في أبسط تفاصيله.. علاقة لو شوفتها من بعيد تقول إن دي علاقة حب. لكن لما بتحصل مشكلة بين الاتنين بيقرروا يبعدوا عن بعض وكل واحد يعيش حياته لوحده.

في محاولتهم للتجاوز، بيقرر كل واحد من الصديقين انه يرتبط بحد تاني، المرة دي ارتباط رسمي وقصة حب مش مجرد صداقة زي اللي بين سارة وعلي. ومن هنا بتظهر شخصية ليلي ورامي (أحمد خالد صالح وجيهان الشماشرجي) وهنا بيبدأ السؤال في الظهور؛ هل هتصمد قصص حب مفتعلة بين أشخاص مش واخدين على بعض مقابل قصة صداقة حقيقية نمت على مدار فترة زمنية طويلة؟

من أكتر الحاجات اللي عجبتني في الفيلم هو الاهتمام بالتفاصيل. السيناريو مكتوب بطريقة تخليك جزء من حياة سارة وعلي، لدرجة إنك بتحس إنك واحد من الشلة. تفاصيل يومهم، النكت، المواقف البسيطة، وكل التفاصيل دي بتخليك متورط في الأحداث أكتر.

الاهتمام ده مش غريب على هبة يسري اللي شاركت في مسلسل “سابع جار”، اللي كان بيركز برضه على تفاصيل الحياة اليومية لشخصياته.

منة شلبي في دور سارة وأحمد داوود في دور علي قدموا أداء رائع. قدروا يجسدوا تطور شخصياتهم بشكل طبيعي، وتحس معاهم إنك بتتفرج على ناس حقيقية مش مجرد شخصيات على الشاشة. ومن الحاجات اللي لفتت انتباهي هو الأدوار الثانوية اللي كانت إضافة جميلة للفيلم. مثلًا، خالد كمال وسوسن بدر قدموا مشاهد مميزة، حتى لو كانت قصيرة.

أما شخصيات رامي وليلى، اللي لعب أدوارهم أحمد خالد صالح وجيهان الشماشرجي، فكانوا بعيدين عن التنميط التقليدي. مكنش فيهم فكرة “الشخص الشرير” اللي بيحاول يدمر قصة الحب زي ما متعودين نشوف في الأفلام القديمة. بالعكس، الشخصيات دي كانت من لحم ودم، عندهم عيوبهم ومميزاتهم.

شريط الصوت في الفيلم كان ممتع جدًا، مليان بأغاني مؤثرة أضافت للفيلم طعم مختلف. تقدر تقول إن الموسيقى كانت بمثابة إهداء لكل الناس اللي أثرت فينا بأغانيها وموسيقاها.

الفيلم رغم جمالياته، مش خالي من العيوب. أول حاجة هي الظروف المادية اللي بيعيشها أبطالنا. علي اللي المفروض بيشتكي من قلة الفلوس، بنشوفه بيخرج في أماكن غالية، وبيصيف في منتجعات مش للطبقة المتوسطة. نفس الكلام على سارة اللي بتشتغل في مكان حكومي، وبرضه عايشة نمط حياة مش منطقي بالنظر لدخلها.

“الهوى سلطان” فيلم بيحاول يعكس لنا فكرة إن قوة العلاقة بتبدأ من الصداقة. وبيطرح سؤال مهم؛ هل الشريك المثالي هو الصديق المقرب؟ رغم إننا عارفين نهاية الفيلم من البداية، لكن الرحلة اللي بناخدها مع الأبطال هي اللي بتخلينا نستمتع بالقصة. فيلم يستحق المشاهدة لكل اللي بيدوروا على شوية رومانسية ممزوجة بالصداقة، وكمان لكل اللي في مرحلة البحث عن شريك الحياة.

في النهاية، لو عاوزين تفصلوا من دوشة الحياة وتستمتعوا بقصة لطيفة، “الهوى سلطان” هيكون اختيار موفق. مع شوية تكبير دماغ للعيوب الصغيرة، هتطلعوا مبسوطين بالتجربة.