غلب شاروخان وكل نجوم بوليوود..اتعرف على أنجح ممثل هندي حاليًا
Cairo 360
كتب: محمود حافظ
في الأغلب، لو سألنا أي مصري عن أشهر ممثل هندي حاليًا، هيقول على طول شاروخان، وأكبر دليل حتى أن رامز جلال (استضافه) في برنامجه رمضان اللي فات، مافيش شك أن شاروخان كاريزما وموهبة عظيمة، وأدواره الرومانسية كانت أكبر سبب في شعبيته الرهيبة عندنا، لكن الحقيقة أنه مش الممثل الأول في تاريخ الهند بالإيرادات.
اللقب ده راح للممثل (الكامل) زي ما بيسموه هناك، اللي بيقدم أقل عدد من الأفلام من شدة تركيزه واهتمامه بالتفاصيل، كانت النتيجة أنه حقق أعلى إيرادات في تاريخ الهند بأفلامه القليلة، والممثل المفضل لكل عشاق السينما الراقية اللي بتقدم فن متعوب فيه، رومانسية وكوميديا وأكشن لكن بأفكار عالية أوي تسيب في حياتك كلها أثر بعد ما تخلص الفيلم.
بنتكلم على الممثل الهندي المسلم (عامر خان) اللي سنه وصل 52 سنة وعمل 4 من أعلى 10 أفلام أرباح في تاريخ بوليود منها أول فيلم على الإطلاق، نتعرف في التقرير ده على بعض أهم أفلامه اللي هتخليك أكيد تشوف بقية الليستة.
1 – 2016 … Dangal
نبتدي بالفيلم الأحدث لعامر خان، من انتاج شركته الخاصة بالاشتراك مع ديزني نفسها، ومش بس وصل أعلى أرقام في بلده لكن بقى أكتر خامس فيلم غير ناطق بالانجليزية يحقق أرباح في التاريخ، عن قصة حقيقة لمصارع هندي نفسه يحقق حلمه في أن بلده تكسب ميدالية ذهبية في أوليمبياد المصارعة الرومانية.
طبعًا مش أول فيلم رياضي عن تحقيق الفوز بعد تعب، لكن التجديد العظيم هنا كان في مواجهة المجتمع كله اللي بيعادي المصارع، والصعوبات مش بس جسدية ومالية لكنها كمان من كلام الناس وغيظهم وسخريتهم، وده لأن المصارع ماخلفش ولد يحقق حلمه، فقرر يدرب بناته على المصارعة اللي مش بيلعبها غير الولاد!
التصوير استمر سنتين لأن عامر خان اضطر يزود وزنه 25 كيلو ويفقدهم تاني علشان يحبك دور الأب العجوز والمصارع الشاب، نفس اللي عمله توم هانكس في فيلم cast away ، اسم الفيلم (دانجال) معناه (منافسة) وأضمنلك انك مش هتشوف فيلم رياضي بالعظمة دي خصوصًا في أغانيه!
PK…2014 – 2
بلدك فيها كام ديانة؟!، أتنين..تلاتة بالكتير؟!، طب ما بالك بالهند اللي فيها 7 أديان رئيسية بالإضافة للملحدين، غير نسبة كبيرة من أديان غير رسمية، وكل دين ليه تنويعاته وتفريعاته، الفيلم ده بيناقش تعدد الأديان بشكل مغامرة كوميدية ورومانسية كلها فن وفلسفة وبطلها ايه؟…مخلوق فضائي!
المرة دي الفضاء هيبعت لنا كائن شبيه بينا مش أخضر ومرعب، الكائن ده بيضيع في عالمنا اللي كل شيء فيه متنوع ومختلف من أول اللبس لحد الدين، ولما يسأل على حل لمشاكله هيلاقي كله بيقول: الله يسهلك..الله أعلم..ربنا يهديك!، من هنا بيدور بطلنا على ربنا!، طب انهي رب في كل دول!!
اسم الفيلم pk معناه (السكران) لأن البطل في نظر كل الناس كدة!، لكن هتكتشف أن السكران ده فاهم عالمنا اكتر مننا كلنا!، والفيلم في وقته كان أول فيلم محقق أرباح لكنه أصبح دلوقت التالت
3 Idiots…2009 – 3
بما إن الدراسة قربت، ومشاكلها المعتادة لكل المراحل، الفيلم ده لازم كل طالب يشوفه وخصوصًا اللي في الجامعة، الحقيقة مش هبالغ لو قلت أنه المفروض يتوزع مع كتب الجامعة في أسطوانة، علشان اللي يفهم فكرته والمغزى منه هيرتاح كتير جدًا في دراسته وشغله، الفيلم ماسابش حاجة الطلبة بيعانوا منها وماتكلمش عليها.
الهند رغم كل تقدمها هي أول بلد في أعداد انتحار الطلبة على العالم بسبب الضغط الدراسي، والنظام الغبي من الحفظ والصم والمناهج المتخلفة، بنشوف في الفيلم 3 أغبياء زي ما العنوان بيقول، وهما أغبياء بس لمجرد أنهم حاربوا نظام تعليمهم الفاشل، بكل قوانينه وتزمته ودكاترة الجامعة!، مع رومانسية وتراجيديا تستاهل وقتك أكيد.
الفيلم من نجاحه اتعمل له نسخة هندية تانية سنة 2012، ونسخة مكسيكية السنة دي، ده غير مشاريع قديمة بنسخة هوليودية كمان!
Like Stars on Earth…2007 – 4
المرة دي الفيلم من إخراج عامرخان كمان، هو في الحقيقة مخرج ومنتج ومذيع كمان!، الرسالة هنا عن الأطفال ودماغهم، خصوصًا اللي بيلاقي صعوبات في التعليم، نقدر نقول مناسب جدًا لأي أب وأم عشان يتقبلوا شخصية طفلهم بكل ما فيها، والعنوان بيقولها بصراحة أن الأطفال (زي النجوم على الأرض).
الحكاية عن طفل مش لاقي نفسه، فاشل في الدراسة فبقى العالم كله ضده، لدرجة أنه بقى يخاف يواجه الناس ويستخبى في أي ركن من الرعب، مين ينقذه وإزاي؟، يرجع له ثقته في نفسه من الكبار اللي مش فاهمينه، نهاية الفيلم هتبكيك أكيد رغم أنها سعيدة، والأغاني كالعادة هتفضل معلقة معاك كتير اوي.
مقترح
معالم وسياحة
أشهر المساجد التاريخية في القاهرة.. معالم مذهلة بتحكي تاريخ عريق
أشهر مساجد القاهرة أقدم مساجد مصر +5
مطاعم
