عيد الفطر 2025.. اعرف أهم الأفلام اللي هتشوفها في سينمات القاهرة!
أفلام تامر حسني أفلام جديدة أفلام عربية أفلام عيد الفطر 2025 أفلام كوميدية السينما في العيد مواسم السينما
Cairo 360
محمد البدري
مع اقتراب عيد الفطر 2025، بتتنافس مجموعة من الأفلام العربية على جذب الشباب اللي أخيرًا هيخرجوا لدور العرض بعد شهر كامل من متابعة دراما رمضان في البيت. وطبعًا بما إننا في كايرو 360 عارفين إنكم بتحبوا السينما، ومع احترامنا الكامل للدراما الرمضانية، مافيش أحلى من خروجة السينما في العيد! متعة الاسترخاء قدام الشاشة الكبيرة علشان تتفرج على ساعة ونص من الضحك والإثارة والتشويق.
يلا بينا نتعرف على أهم الأفلام اللي هتنزل في موسم عيد الفطر 2025.
سيكو سيكو
واحد من أكتر الأفلام المنتظرة في الموسم! الفيلم بيجمع بين الكوميديا والحياة الشبابية، وبيحكي عن شابين، واحد Gamer والتاني شغال في شركة شحن، وبتدور بينهم مجموعة مواقف كوميدية لا تنتهي.
سيكو سيكو بطولة عصام عمر وطه دسوقي، الثنائي اللي كسر الدنيا في دراما رمضان 2025، وده مخلي ناس كتير مستنية الفيلم ده بالتحديد. كمان بيشارك في البطولة سليمان عيد وخالد الصاوي، فاستعدوا لضحك كتير!
ريستارت
تامر حسني بيرجع للسينما بفيلم جديد في العيد! ريستارت فيلم كوميدي لسه تفاصيل قصته مش معروفة بالكامل، لكن اللي نعرفه إنه هيكون مليان مواقف دمها خفيف.
بيشارك في البطولة هنا الزاهد، محمد ثروت، وباسم سمرة، والفيلم من تأليف أيمن بهجت قمر وإخراج سارة وفيق.
الصفا الثانوية بنات
محبي مسرح مصر على موعد مع فيلم هيعجبهم جدًا! الصفا الثانوية بنات بيحكي عن قصة حب بتدور في مدرسة ثانوي، لكن طبعًا الأحداث مش هتعدي من غير ضحك ومواقف كوميدية غير متوقعة.
الفيلم من بطولة علي ربيع، سارة الشامي، إسماعيل فرغلي، وهالة فاخر، ونجوم تانيين هيكملوا الأجواء المضحكة!
نجوم الساحل
لو بتحب أجواء الساحل والحفلات، الفيلم ده ليك! نجوم الساحل فيلم كوميدي عن مجموعة شباب بيقرروا ينظموا حفلة غير تقليدية في الساحل، بس طبعًا الأحداث بتاخد منحنيات غير متوقعة!
بطولة أحمد داش، مايان السيد، علي صبحي، وكزبرة، واللي واضح إنهم محضرين لنا جرعة كوميديا شبابية بامتياز.
واضح إن الكوميديا هي الملك في موسم أفلام عيد الفطر 2025! انتظروا مراجعاتنا للأفلام اللي هتحقق أعلى إقبال، وشاركونا في التعليقات.. ناويين تتفرجوا على إيه في العيد؟
