The Definitive Guide to Living in the Capital , Cairo , Egypt

بعض الأفلام مالهاش حلول وسط، يا تحبها قوي يا تكرهها قوي. وفيلم “خيال مآتة” من الأفلام دي، آراء الناس خارج دور العرض كانت ما بين عاشق للفيلم ومابين كاره له تمامًا. إحنا هنحاول نوصل لكم إيه هي أسباب تكوين الانطباعات دي عن الفيلم.

الفيلم من تأليف “عبد الرحيم كمال” بيحكي عن يكن (أحمد حلمي) الإنسان البخيل، واللي بينفذ عملية سرقة مرتبطة بالسيدة “أم كلثوم” وبعد سنين طويلة بيقرر يلجأ للسرقة تاني. لكن المرة دي استعان بحفيده (اللي هوه أحمد حلمي برضه) واللي بنشوفه طول الوقت في حالة مشاكسة رومانسية مع آسيا اللي قامت بدورها الفنانة “منه شلبي”.

من حيث الحبكة والفكرة، الفيلم بيتبع نفس السكة اللي بتمشي عليها معظم أفلام حلمي السابقة. الشخص اللي فيه صفة سلبية واللي بيمر بتجربة بيتغير بعدها تمامًا، وبيشوف الدنيا بشكل مختلف.

الحبكة دي ممكن يطلع منها شغل كويس جدًا، لكن للأسف السياق الدرامي اللي بتدور فيه الأحداث فيه مشكلة، أو بمعنى تاني إن الشخصيات اللي بنشوفها على الشاشة مالهاش خلفية تخلينا نحبها أو نكرهها أو نتعاطف معاها حتى، وده بشكل كبير كان سببه السيناريو اللي كان ينفع يكون أحسن من كده.

بالنسبة لإيقاع الفيلم فكان بطىء جدًا على عكس توقعاتنا، ودي نلوم فيها المخرج “خالد مرعي” حتى إن بعض المشاهد غير الكوميدية كانت بتستمر لأطول من وقتها بكتير، وبعض المشاهد اللي كان ممكن يطلع منها كوميديا كتير كانت بتخلص بسرعة وده خلانا نحس أنها اتقطعت من سياقها.

حتى الكوميديا اللي المفروض تبقى الملعب الأساسي لأحمد حلمي، حسينا فيها إن كان ممكن في بعض المواقف الخاصة بالفيلم يطلع منها كوميديا أقوى بكتير من اللي شوفناها على الشاشة، حتى ستايل الكوميديا نفسه حسينا إنه قديم، وفكرنا شوية بأفلام زي “مطب صناعي” مثلاً وغيرها من أفلام أحمد حلمي.

الكيمياء اللي بين أحمد حلمي ومنة شلبي كويسة جدًا، لكن حسينا إن الكيمياء دي ماتمش إستغلالها بشكل كامل علشان نشوف في النهاية فيلم كويس.

ديكورات الفيلم ومكياجه – خاصة مكياج شخصية يكن- كان مميز جدًا، لكن المشاهدين اللي مستنيين كل السنين اللي فاتت علشان يشوفوا جديد أحمد حلمي، واللي كانت توقعاتنا بخصوصه بتزيد يوم بعد يوم من الترقب، مكانوش متوقعين إنهم يتفرجوا على فيلم أحلى ما فيه المكياج! ومن هنا بتيجي مشكلة بعض المشاهدين مع الفيلم.

أما لو ماعندكش أي نوع من التوقعات وعاوز تتفرج على قصة واضحة بدون تعقيدات كتير ومش متوقع تقع على الأرض من الضحك – لأن ده مش هايحصل- في الحالة دي ممكن يعجبك خيال مآتة.