The Definitive Guide to Living in the Capital , Cairo , Egypt

في أوساط العاملين في مجال السينما، فيه خلطة قديمة ومضمونة النجاح. قائمة على مجموعة من الإيفيهات الكوميدية مع بعض الأغاني الشعبية، وبعض بطلات الصف الثاني مع نجم كوميدي. والنتيجة دائمًا بتكون النجاح التجاري.

لكن على الرغم من محاولة صناع فيلم حليمو أسطورة الشواطئ اللعب على نفس التوليفة القديمة، إلا إنهم ماقدروش يحققوا نفس النجاح. تعالوا نحاول نتعرف أكتر على الأسباب.

القصة

حليمو أسطورة الشواطئ بيحكي عن رجل اسمه حليمو بيشتغل في الإنقاذ البحري، لكنه في نفس الوقت مش بيعرف يعوم. الأمر اللي بيترتب عليه مجموعة كبيرة من المواقف الكوميدية، واللي بتعتمد بشكل أساسي على ردود أفعال حليمو في المواقف اللي بتحصل حواليه.

فريق العمل

الفيلم إخراج محمد سعيد وتأليف محمد فضل. ومن بطولة: طلعت زكريا، نرمين ماهر، دينا وهبة السيسي، ورامي غيط.

الأداء التمثيلي

الأداء التمثيلي لأبطال الفيلم كان في دائرة الأداء التقليدي، المحفوظ والمتوقع من الأبطال دي. بدون أي زيادة أو محاولة لتقديم أداء مختلف. بشكل أو بآخر حسينا أن معظم المشاركين في الفيلم كانوا بيعملوا (سبوبة) بالمعنى الدارج للكلمة. مجرد مشاركة في فيلم علشان الفلوس.

السيناريو والحوار والإخراج

سيناريو الفيلم سهل الفهم ومافيهوش أي تعقيدات. والحوار كان هو المُعتمد عليه بنسبة 100% تقريبًا، علشان يقدم الإيفيهات والمواقف الكوميدية. والإخراج مابذلش مجهود علشان يقدم أي جديد على مستوى الأحداث، وباقي العناصر المكونة للأفلام بشكل عام.

الديكورات والموسيقى والأزياء

طبعًا من الصعب أننا نتكلم عن الديكورات أو الموسيقى في فيلم تقليدي، بيحاول يقدم لنا التوليفة القديمة للأفلام متوسطة النجاح. وللأسف الديكورات والموسيقى جاءت في مستوى أقل من المقبول.

الخلاصة

فيلم حليمو أسطورة الشواطئ دليل كبير على أن الخلطة القديمة للأفلام، واللي بيستسهل كتير من المنتجين ويقدموها لنا، مش هتحقق نجاح كبير الفترة الجاية.

علشان تبقى عارف: طلعت زكريا بطل الفيلم واحد من نجوم الكوميديا في مصر، قدم مشاركات صغيرة في عدد كبير من الأفلام والمسلسلات في بداية حياته الفنية. وبعدين قدم فيلم طباخ الرئيس اللي كان سبب في شهرته، واللي يعتبر واحد من أهم الأفلام اللي قدمها. مشهور عنه تصريحاته الصادمة في عالم السياسة والفن.