في عيد الأم.. أفلام حلوة تشوفها في البيت مع ست الحبايب
أجمل أفلام عن الأم أفلام عن الأم الأم في السينما فيلم الحفيد فيلم عائلة ميكي
Mohamed Hamdy
يوم عيد الأم من الأيام المميزة اللي بننتظرها من السنة للسنة. يمكن لأن طبيعة الحياة السريعة اللي بنعيشها حاليًا بتخلينا بعيد عن أمهاتنا لظروف الشغل أو الدراسة، علشان كده كايرو 360 بتستغل اليوم ده علشان تقترح لكم مجموعة من الأفلام اللي لازم تشوفوها مع ست الحبايب يوم عيد الأم، وممكن تضيف على السهرة المسائية في اليوم ده بهجة وجمال.
فيلم الحفيد
من الأفلام المميزة في تاريخ السينما المصرية، لأنه بينزل لحياة الأسرة المصرية البسيطة والعادية، وبيستعرض مجموعة من المشاكل الاجتماعية الموجودة في كل بيت تقريبًا بداية من سنة 1974 وهي سنة إنتاج الفيلم وحتى لحظة كتابة السطور دي.
لعبت دور الأم والجدة هنا الفنانة القديرة الراحلة كريمة مختار، واللي قدرت تجسد في الفيلم دور متميز بنفتكره لها لحد النهارده.
Mother’s Day (2016)
اسم الفيلم يعتبر اسم على مسمى وهو من تأليف توم هاينز وإخراج جاري مارشال وبطولة جينفر آنستون وجوليا روبرتس وكيت هيدسون، بنشوف قصة مجموعة من الأمهات من أجيال مختلفة بيجتمعوا في مكان واحد يوم عيد الأم.
وبنرشح الفيلم للمشاهدة علشان مهما كان عمر ست الحبايب، هتحب الفيلم وهتتابع أحداثه من البداية للنهاية بشغف وحب.
Stepmom
من الأفلام الجميلة اللي بتجمع بين الكوميديا والرومانسية، عن سيدة بتحاول تجيب عروسة لزوجها، بعد تيقنها من الوفاة في فترة قريبة.. العروسة دي بتكون المربية اللي بتقعد مع الأولاد، علشان تضمن إنها هتعاملهم كويس.
الفيلم من بطولة آد هاريس وجوليا روبرتس، وعلي الرغم من المأساة اللي ممكن يكون بيتناولها الفيلم، لكن الكوميديا كانت غالبة علي أحداث الفيلم اللي بينتمي لفترة التسعينيات الجميلة.
Stop! Or My Mom Will Shoot
وبما إننا لسة في فترة التسعينيات، لازم نقول لكم علي فيلم كوميدي عن الأمهات هيخليكم تقعوا علي الأرض من كتر الضحك.. الفيلم اللي بيقوم ببطولته سلفستر ستالون في واحد من أفلامه الكوميدية النادرة، واللي بيحكي عن ظابط شرطة بتنتقل والدته للحياة معاه، وبتبدأ تتدخل في كل تفاصيل حياته وعمله.
عائلة ميكي
وزي ما بدأنا معاكم بفيلم عربي، بنختم موضوعنا برضه بفيلم عربي، وحبينا أنه يكون معاصر وكوميدي علشان عيد الأم مناسبة تستحق الاحتفال والبهجة. فيلم عائلة ميكي يعتبر فيلم خفيف من بطولة لبلبة وعمرو عابد و حسن حرب.
الفيلم بيحكي عن يوم غير عادي في حياة أسرة مصرية عادية، وكمية كبيرة من المشكلات والتعقيدات اللي بتواجه الأسرة خلال اليوم ده، واللي بيصادف حضور أحد القنوات الفضائية لتصوير حلقة من حلقات الأسرة المثالية مع العائلة الغير مثالية بالمرة!
عيد الأم مناسبة لا يمكن تفوتها بدون مشاهدة فيلم أو اتنين يخلوا اليوم ده مثالي… بس ما تنساش تتفرج مع ست الحبايب!
مقترح
معالم وسياحة
متحف إيمحتب.. أسرار العمارة الفرعونية في قلب سقارة
السياجحة في مصر تاريخ مصر القديمة +5
معالم وسياحة
