The Definitive Guide to Living in the Capital , Cairo , Egypt

القاهرة مليانة أماكن علمية عظيمة، بس للأسف مش كلها واخدة حقها في الإعلام، وعلشان كده إحنا في كايرو 360 دايمًا بندور على أجمل الأماكن اللي تستاهل الزيارة وسط زحمة العاصمة، والنهارده هنتكلم عن واحد من أكتر الأماكن اللي هتبهرك، وهو مرصد القطامية الفلكي الكبير، واللي بيضم أكبر تليسكوب في الوطن العربي والشرق الأوسط وشمال أفريقيا.

المرصد مش بس مكان للتلسكوبات، ده كمان ليه تاريخ مشرف جدًا، ومن أهم إنجازاته إنه شارك في الأرصاد الدقيقة اللي اتعملت لسطح القمر علشان يحددوا أماكن الهبوط في رحلة الإنسان للقمر في أواخر الستينيات!

مرصد القطامية موجود على بعد حوالي 80 كم من وسط القاهرة في اتجاه السويس (طريق العين السخنة)، فوق جبل ارتفاعه حوالي 480 متر عن مستوى البحر، وبيتبع المعهد القومي للبحوث الفلكية والجيوفيزيقية بحلوان، وبدأت حكايته سنة 1964 كامتداد لمرصد حلوان اللي اتأسس سنة 1903.

أول ما تدخل المرصد، هتحس إنك دخلت عالم تاني، أول حاجة هتشدك هي القبة الكبيرة اللي فوق مبنى التليسكوب الرئيسي، جواه هتلاقي تليسكوب ضخم وزنه أكتر من 50 طن وطول أنبوبته أكتر من 9 متر، وقطر المراية بتاعته حوالي 188 سم، وفيه كمان تليسكوب أصغر بحجم 14 بوصة.

المرصد فاتح أبوابه لكل محبي الفلك من كل الأعمار، وبيستقبل كمان طلاب الجامعات من قسم الجغرافيا علشان يتعرفوا عمليًا على السماء والمجرات والنجوم والكواكب، وهناك هتتعلم إزاي تستخدم الكاميرات علشان تحدد خط الأفق، وترسم تضاريس القمر، وتتعرف على الاتجاهات بالليل باستخدام مجموعة نجوم الدب الشمالي، وكمان تتابع حركة مجرة أندروميدا القريبة من درب التبانة.

المرصد مجهز كويس جدًا، فيه استراحات للزوار، ومحطة طاقة بالكهربا علشان تشغّل الأجهزة الكبيرة، وموقعه بعيد عن زحمة القاهرة فعدد الليالي اللي فيها سما صافية بيوصل لـ250 ليلة في السنة! وده خلى المرصد مميز جدًا في دقة الصور وجودة الأرصاد، ومعروف عالميًا بين المراصد الكبيرة.

طيب.. إزاي تزور مرصد القطامية؟

المرصد مفتوح للزيارات بس فيه خطوات بسيطة لازم تعملها، أول حاجة تروح لقسم الفلك في حلوان وتقدم طلب زيارة ومعاه صورة بطاقتك، هتاخد بعدها تصريح رسمي مختوم، ولما توصل هناك تسلمه للأمن مع صورة بطاقتك، وتدفع رسوم الزيارة اللي بتبدأ من 70 جنيه لو رايح وراجع في نفس اليوم.

ولو حابب تبات للصبح علشان تستمتع بشروق الشمس وسط الجبال والسما، السعر بيكون 100 جنيه. المرصد مش بيقدم أكل أو عصاير، بس فيه ثلاجة وكاتيل، وكمان مسموح بالتصوير بالكاميرات، والمشرفين هناك هيشرحوا لك كل حاجة.

نصيحة أخيرة: خلي معاك جاكيت، الجو هناك بالليل بيبقى برد!