قررت تعيش خارج القاهرة؟ دليلك للبحث عن سكن في مدينة جديدة
أجازة استرخاء إزاي ألاقي شقة الحياة خارج القاهرة السفر داخل مصر الهروب الكبير حياة جديدة سفر شقة شقة للإيجار
Rehab Noor
#الهروب_الكبير سلسلة من كايرو 360 بدأت بمقال “دليلك للخروج من القاهرة والحياة في مدينة جديدة” وبنكمل معاكم السلسلة من خلال المقال ده، اللي بيشرح لك خطوات البحث عن سكن في المدينة اللي قررت تتوجه لها، وسواء كنت بتفكر تاخد أجازة طويلة وتهرب من الزحمة والتوتر وضغط الحياة في مدينة كبيرة زي القاهرة، أو لو ظروف حياتك وشغلك خلتك تقرر تنقل لمدينة جديدة غير العاصمة، أول حاجة محتاجها إنك تلاقي مكان تعيش فيه.
والبحث عن شقة مناسبة موضوع مش سهل، وخصوصًا لو في مدينة جديدة إنت ماتعرفهاش، لكن ده مش مفروض يوقفك عن إنك تاخد الخطوة وتغير حياتك للأحسن، أو حتى إنك تستمتع بفترة تغيير واسترخاء في مكان جديد وجميل. وعشان عملية البحث تكون أسهل عليك هنتكلم عن مجموعة خطوات ونصايح ممكن تساعدك تلاقي الشقة المناسبة ليك وإللي هتكون بيتك المريح في الفترة إللي هتقضيها خارج القاهرة.
أول خطوة محتاج تاخدها في بحثك عن شقة هي إنك تبتدي تدورعلى معلومات عن المناطق المختلفة في المدينة إللي أنت رايحها وتحدد المناطق الأنسب ليك. يعني لازم تحدد العناصر المهمة بالنسبالك في المكان إللي هتعيش فيه. هل مثلًا بتدور على منطقة هادية ولا حية، و إيه الحاجات إللي محتاج تكون قريبة منك زي المحلات والمطاعم والمستشفيات. ممكن تلاقي معلومات عن المناطق في كل مدينة من خلال الإنترنت، وخاصة لو دورت على المجموعات الخاصة بالمدينة على فيسبوك، ودي هتبقى بداية كويسة لمعرفتك عنها. لكن نصيحتنا ليك إنك تروح المدينة نفسها لفترة مش أقل من عشر أيام. وخلال الفترة دي هتقدر تلف وتتعرف على المناطق المختلفة بنفسك، وساعتها هتحس أنهي أماكن هتكون مريحة ومناسبة أكتر ليك، وهتقدر تحدد منطقتين أو تلاتة تركز عليهم في بحثك عن الشقق.
بعد تحديدك المناطق إللي هتدور فيها تقدر تبدأ في البحث عن شقة. وفي بداية المرحلة دي هتكون محتاج تحدد مجموعة عناصر هتسهل عليك البحث جداً وتوفر عليك وقت ومجهود كبير. العناصر دي هي:
– ميزانية للإيجار إللي تقدر تدفعه خلال فترة إقامتك. وده مش لازم يبقى رقم محدد لكن إطار للمبلغ المناسب ليك وإللي ممكن يزيد أو يقل شوية. تحديدك للميزانية هيساعدك تعرف أكتر المنطقة ونوع الشقة إللي هتقدر تتحمل تكاليف إيجارها.
– المساحة وعدد الغرف في الشقة، وده بيعتمد على عدد الناس إللي هيكونوا معاك وهل إنت لوحدك ولا معاك أسرتك أو أصحابك، وكمان لو هتعمل حسابك إن في ضيوف هييجوا يقضوا معاك فترات خلال إقامتك. العنصر التاني إللي هتحدد بيه المساحة هو راحتك الشخصية وهل إنت بتحب الأماكن الواسعة ولا ممكن تكتفي بمكان صغير لطيف. وده مهم إنك تحطه في إعتبارك عشان تكون مرتاح في بيتك الجديد.
– الأثاث والأجهزة إللي محتاج وجودها عشان استخداماتك اليومية. هل مثلًا محتاج غسالة ولا هتروح لمغسلة برة، هل محتاج بوتاجاز كبير ولا واحد كهربائي صغير هيكون كفاية، هل التلفزيون مهم ولا مش فارق معاك.. إلخ. يعني لازم تكون عارف إيه الأساسي وإيه إللي تقدر تستغني عنه وكمان إيه إللي ممكن تشتريه أو تنقله من القاهرة قبل ما تختار شقة جديدة وتكتشف إنها ناقصة جهاز أو قطعة أثاث مهمة لحياتك.
– الخدمات إللي محتاجها زي الإنترنت وخط التليفون أو خدمة التنظيف ووجود أمن في المكان. الحاجات دي لازم تسأل عليها لأنها مش موجودة في كل مكان برة القاهرة، ده غير إنها بتفرق كتير في سعر إيجارات الشقق.
– التفاصيل المختلفة المهمة بالنسبالك زي مثلًا المنظر إللي بتشوفه من الشبابيك في الشقة أو وجود بلكونة كبيرة أو جنينة تحت العمارة. العوامل دي بتفرق جدًا مع ناس وممكن تخلي تجربتهم في المكان سعيدة أو العكس.
طبعًا في عناصر تانية كتيرة في اختيار المكان إللي هتعيش فيه، والأولويات بتختلف من شخص للتاني، عشان كدة إنت هتحتاج تفكر وتحدد إيه العوامل التانية المهمة بالنسبالك بالإضافة للي إحنا اتكلمنا فيهم ومن خلال ده هتحدد مواصفات الشقة المناسبة وبحثك عنها هيكون أسهل. كمان لما تكون محدد المواصفات دي هتقدر تسأل صاحب الشقة أو السمسار عليها قبل ما تنزل تتفرج على الشقة بالفعل، وبالتالي هتوفر على نفسك مشاوير ومجهود اللف على شقق مش مناسبة أو ناقصة الحاجات الأساسية بالنسبالك.
ولو اتكلمنا عن عملية البحث نفسها لازم نقول إن في أكتر من طريقة تدور بيهم على شقة وكل طريقة ليها مميزات وعيوب محتاج تحطها في حساباتك. يعني مثلًا لو هتستخدم مواقع البحث عن شقق زي Airbnb لازم تكون عارف إن الشقة على الحقيقة ممكن تكون مختلفة جدًا عن الصور إللي هتشوفها على الموقع لأن الصور دي بتتاخد والشقة لسة جديدة ومتنضفة وبتظهر أفضل زوايا فيها، لكن لما تشوفها على الواقع ممكن تكون ابتدت تقدم وأثاثها يتكسر أو تكون أقل نضافة من إللي إنت متوقعه أو مافيهاش كل المميزات إللي مكتوبة في الإعلان.
وده حصل بالفعل معانا، عشان كدة بننصحك إنك تحجز عدد أيام قليل من خلال المواقع دي وتستنى لما تشوف الشقة على الطبيعة قبل ما تقرر تعيش فيها فترة أطول. لكن برضه في ميزة مهمة في المواقع إللي زي Airbnb و Booking وهي الأمان في الدفع، ده غير طبعًا سهولة البحث والتعامل وسرعة الحجز بدون أي مجهود.
أما البحث على فيسبوك فهو من أهم الطرق إللي تقدر تستخدمها في إنك تلاقي شقة لأنك هتلاقي عليه صفحات وأكتر من جروب لكل مدينة بيكون فيهم إعلانات عن شقق للإيجار وأرقام أصحاب الشقق والسماسرة وبعض الشركات المختصة كمان. الميزة الأكبر هنا هي الاختيارات الكتير إللي ممكن تلاقيها وإنك تقدر تسأل أكتر عن المنطقة والشقة من خلال التعليقات والرسائل. لكن لازم تاخد بالك في التعامل علشان متلاقيش نفسك بتدفع فلوس لناس على الفاضي أو تواجه نفس المشكلة في اختلاف حالة الشقة ومميزاتها عن الصور الموجودة في الإعلانات والبوستات على فيسبوك.
الطريقة التالتة والتقليدية هي إنك تنزل بنفسك تلف في الشوارع وتسأل على شقق متاحة للإيجار. وعلى الرغم من إنها طريقة قديمة ومافيهاش أي تكنولوجيا، لكن مش دايمًا الطرق التقليدية بتكون سيئة.. اللف في الشوارع وسؤال الناس هيخليك تشوف كل حاجة على الطبيعة وكمان هيتيح ليك إنك تلاقي فرص تتفرج على شقق مش موجودة على الإنترنت وممكن جدًا تلاقي الاختيار المناسب ليك بالطريقة دي. المشكلة الأكبر هنا هي الوقت الكبير والمجهود إللي هتبذله في المشي واللف، وطبعًا هتحس بشوية توهان وحيرة وإنت بتلف في شوارع متعرفهاش. لكن لو إنت وقتك يسمح ممكن تعتبر اللف ده فسحة ومغامرة صغيرة هتخليك تكتشف أماكن وناس مختلفة وتقدر تستمتع بالتجربة.
زي ما قلنا، البحث عن شقة عمره ما كان سهل، لكن ممكن يكون تجربة مفيدة وظريفة لو قدرت تحدد المواصفات إللي أنت محتاجها بشكل واضح وركزت في بحثك عنها بدون تشتيت. ونصيحتنا ليك إنك تحاول تجمع بين طرق البحث المختلفة وماتعتمدش على طريقة واحدة بس عشان تستفيد من مميزات كل طريقة وتزود فرصتك إنك تلاقي بيت مريح وجميل تعيش فيه فترة جميلة من حياتك.
مقترح
فن وثقافة
عامر التوني.. صوت المولوية اللي ترك الدنيا لكنه باقي في القلوب
الإنشاد الصوفي التنورة +7
الحياة في كايرو
