The Definitive Guide to Living in the Capital , Cairo , Egypt

كل سنة وأنتم طيبين! في 25 أبريل من كل سنة، بنحتفل بواحد من أهم الانتصارات اللي حققتها مصر بعد معاهدة كامب ديفيد، وهو انسحاب آخر جندي إسرائيلي من أرض الفيروز. وعلشان نفضل دايمًا فاكرين، وزارة الدفاع قررت تفتح 3 متاحف عسكرية مجانًا للجمهور يوم الجمعة 25 أبريل 2025، بمناسبة مرور 41 سنة على تحرير سيناء.

تعالوا نتعرف على المتاحف دي:

المتحف الحربي – قلعة صلاح الدين

واحد من أكبر المتاحف العسكرية في الشرق الأوسط. اتأسس أول مرة سنة 1937 في منطقة الفلكي، وبعد كده اتنقل لجاردن سيتي، لحد ما استقر في موقعه الحالي جوه قلعة صلاح الدين الأيوبي سنة 1949.

المتحف بيحكي تاريخ الجيش المصري من أيام قدماء المصريين لحد النهاردة، وفيه قاعات عرض متطورة بتستخدم تقنية الهولوجرام والعروض التفاعلية، وده بعد التجديد الكبير اللي حصل فيه سنة 2021.

العنوان: شارع صلاح سالم – السيدة عائشة – قلعة صلاح الدين الأيوبي.

بانوراما أكتوبر – مدينة نصر

بانوراما 6 أكتوبر اتفتحت سنة 1989 بالتعاون مع كوريا الشمالية، وبتعرض بطولات الجيش المصري في حرب أكتوبر بطريقة تفاعلية ممتعة، باستخدام أحدث تقنيات العرض.

هتلاقوا هناك معدات حقيقية شاركت في الحرب، وكمان مبنيين بيحكوا قصة الصمود والانتصار من قبل الحرب لحد ما انتهت.

العنوان: شارع استاد القاهرة – قدام عمارات العبور – مدينة نصر.

متحف الزعيم جمال عبد الناصر – مصر الجديدة

المتحف اتأسس سنة 2014، والمميز فيه إنه موجود في بيت الرئيس الراحل نفسه.

بيتكون من 3 أقسام: قاعة المقتنيات (أوسمة وهدايا شخصية)، وقاعة منشية البكري (فيها مكتب وغرف البيت)، وقاعة “حكاية شعب” (بتعرض محطات حياته من 1952 لحد 1970).

العنوان: شارع الخليفة المأمون – منشية البكري – مصر الجديدة.