The Definitive Guide to Living in the Capital , Cairo , Egypt

الصيف بيحب البحر والخروج وطبعًا الاستمتاع بجمال الساحل الشمالي، قررنا في كايرو 360 نجرب خدمة بلو باص اللي بتوفر مواصلات من وإلى الغردقة والعين السخنة وبعض الأماكن التانية، وإحنا جربنا الخدمة من الساحل الشمالي والقاهرة.

أول حاجة لاحظناها في أتوبيسات شركة بلو باص إن الكراسي بتاعتها مريحة جدًا وسعر التذكرة شامل وجبة خفيفة وخدمة واي فاي وشحن للموبايل وشاشة عليها أفلام وكتب ولعب يعني كأنك في الطيارة بالظبط.

فيه نوعين من التذاكر تذكرة بـ 165 جنيه ودي في النص التاني من الأتوبيس وبتكون زي الأتوبيس العادي كرسيين جنب بعض. وتذكرة في أول الأتوبيس بـ 210 جنيه ودي بتكون كرسي واحد بس في الصف، مش اتنين علشان تقعد براحتك.

طريقة الحجز المضمونة اللي جربناها كانت من خلال الكول سنتر وبتدفع من فوري أو من أي فرع قريب منك بس في خلال 3 ساعات بس من الحجز، أما لو جربت تحجز من الويب سايت فممكن تواجه بعض المشاكل الفنية، زي مثلًا ممكن يرفض الكريدت كارد، لكن لما كلمناهم تليفونيًا الأمرو كانت أفضل.

فيه مشكلة أن الخطوط مشغولة دايمًا. ودي حاجة نتمنى منهم يحلوها قريب، وبتقدر تكلمهم على الرقم ده 16128. لكن لو حجزت من خلال فوري بتدي رقم العملية في أول مكتب يقابلك علشان يطبع لك التذكرة. وتقدروا تشوفوا صفحتهم على الفيسبوك من هنا. 

الرحلة بتبدأ من الساحل الشمالي من محطة جنب مراسي وبعد كده بيعدوا على حوالي 3 محطات منها بورتو مارينا ومارينا وزهران، وبعد كده بتوصل القاهرة وبيكون فيه محطتين واحدة في الشيخ زايد وواحدة في التجمع عند المشير طنطاوي.

الوجبة اللي بيقدموها عبارة عن زجاجة مياه وعصير وبوكس فيه 3 مونجيني شوكولاتة وواحد باتيه بالجبنة. المياه في تجربتنا كانت سخنة وكنا نتمنى أن جودة المنتجات بالنسبة للسعر تكون أفضل من كده. وكمان بيدوك سماعات علشان تسمع بيها الأفلام. 

كمان بالرغم من إن الكرسي مريح إلا إننا قعدنا حوالي 6 ساعات من الساحل للقاهرة منهم ساعتين بنلف على المحطات وبيركبوا ناس جديدة وده طبعًا خد من وقت الرحلة.

في النهاية تجربة بلو باص مريحة جدًا لو بتحب تقضي وقت طويل في الأتوبيس ونتمنى أنهم ياخدوا بالهم من السلبيات.