The Definitive Guide to Living in the Capital , Cairo , Egypt

بتكلفة حوالي مليار دولار، بيتم حاليًا الانتهاء من أعمال المتحف المصري الكبير، اللي هيتم افتتاحه السنة الجاية 2021 واللي هيشهد حفل افتتاح عالمي هيحضره أهم نجوم ورؤساء وملوك العالم، وهيُنقل على الهواء مباشرة من خلال شركة بث عالمية، وهيكون الافتتاح على أكتر من يوم، وطبعًا هيفتح للجمهور بعد حفل الافتتاح مباشرة، وعلشان كده هنقول لكم  على أسعار التذاكر اللي أقرها المجلس الأعلى للآثار.

بالنسبة للأجانب هيكون سعر التذكرة لزيارة كل القاعات 500 جنيه، وزيارة قاعة توت عنخ آمون بـ400 جنيه، وزيارة القاعة الرئيسية 200 جنيه.

أما المصريين والعرب، فهيكون سعر التذكرة لزيارة كل القاعات 60 جنيه، وسعر زيارة قاعة توت عنخ آمون 50 جنيه، وزيارة القاعة الرئيسية 30 جنيه، وللطالب هيكون سعر تذكرة زيارة كل القاعات 30 جنيه، والأطفال أقل من 6 سنوات مجانًا.

أما سعر تذكرة الدخول من البوابات الخارجية لمجمع المتحف فهتكون 30 جنيه، وهتتخصم عند دخول المتحف أو استخدام أي خدمات موجودة جواه.

مساحة مجمع المتحف المصري الكبير حوالي 500 ألف متر مربع، ثلث مساحته هي المتحف (168.00 متر مربع) وبيضم حوالي 100 ألف قطعة أثرية هيشوفها العالم لأول مرة، على اعتبار إنه واحد من أكبر متاحف العالم، ويعتبر أكبر مشروع حضاري وثقافي عالمي في وقتنا الحالي، أما باقي المساحة فهتكون عبارة عن سينما متخصصة وبازارات ومجمع ثقافي وسياحي وترفيهي، ومركز للبحث العلمي على مستوى عالمي، مجهز لاستقبال الباحثين الأثريين من كل أنحاء العالم.